نواسہ رسول حضرت امام حسینؓ اور ان کے جانثار ساتھیوں کی لازوال قربانی کی یاد میں ملک بھر میں آج یوم عاشور کے موقع پر جلوس نکالے گئے۔
لاہور میں یوم عاشور کا مرکزی جلوس نثار حویلی اندرون موچی گیٹ سے برآمد ہوا جو کربلا گامے شاہ پہنچ کر اختتام پذیر ہوا۔
کراچی میں یوم عاشور کا مرکزی جلوس صبح 10 بجے نشتر پارک سے برآمد ہوا جو مقررہ راستوں سے ہوتا ہوا امام بارگاہ حسینیاں ایرانیاں کھارادر پر ختم ہوا۔
روہڑی میں طویل دوراینےکا نو ڈھالہ تعزیہ جلوس طویل مسافت طے کرکے اور منڈو کھبڑ اور کربلا میدان میں قیام کے بعد شہداء قبرستان اسٹیشن روڈ پہنچ کر اختتام پذیر ہوا۔ جلوس 8 اور 9 محرم کی رات شمع گل ہونےکےبعد امام بارگاہ شاہ عراق سےبرآمد ہوا تھا۔
حیدرآباد میں یوم عاشور کا مرکزی جلوس قدم گاہ مولا علی سےبرآمد ہوا جو کربلا دادن شاہ پر ختم ہوا۔
میرپور خاص،بدین، جیکب آباد، ٹھٹہ، لاڑکانہ، نواب شاہ، دادو، خیرپور اور سمیت سندھ کےچھوٹے بڑے شہروں میں شہدا کربلا کو خراج عقیدت پیش کیا گیا۔
ملتان میں یوم عاشور کا امام بارگاہ حرا حیدریہ سے نکلنے والا مرکزی جلوس درگاہ شاہ شمس تبریز پہنچ کر ختم ہوا، قدیمی استاد اور شاگرد کے تعزیوں کے جلوس بھی برآمد ہوئے۔
فیصل آباد میں مرکزی جلوس امام بارگاہ عزا خانہ شبیر دھوبی گھاٹ پر ختم ہوا، عزاداروں نے امام عالی مقام اور ان کےعزیزوں اور ساتھیوں کی شہادتوں کو سلام پیش کیا۔
گوجرانوالہ، بہاولپور، بہاولنگر، راجن پور، جھنگ، سرگودھا، لودھراں، ڈی جی خان، وہاڑی، جہلم، نارووال سمیت دیگر علاقوں سے نکالےگئے، جلوس اپنی منزلوں پر پہنچ کر اختتام پذیر ہوگئے۔
پاڑا چنار، نوشہرہ، مانہسرہ، ڈیرہ اسماعیل خان، کوہاٹ، بنوں، مردان اور ٹانک میں عزاداروں نے نواسہ رسول اور کربلا کےشہداء کو نذرانہ عقیدت پیش کیا اور جلوس نکالے۔
گلگت میں مرکزی جلوس مقررہ راستوں سے ہوتا ہوا واپس مرکزی امامیہ مسجد پہنچ کر اختتام پذیر ہوا، اسکردو،گانچھے،کھرمنگ، شگر، استور میں یوم عاشور کےماتمی جلوس روایتی راستوں سےہوتےہوئے واپس اپنےمقامات پر ختم ہوئے۔
مظفرآباد میں عاشورہ کا مرکزی جلوس امام بارگاہ پیرعلم شاہ بخاری پر ختم ہوا، میرپور، بھمبر، سمیت دیگر اضلاع میں عاشورہ کےجلوس برآمد ہوئے۔
کوئٹہ میں یوم عاشور کا مرکزی جلوس علمدار روڈ سے برآمد ہوا، اس دوران موبائل فون اور انٹرنیٹ سروس بند جب کہ موٹر سا ئیکل کی ڈبل سواری پر پابندی عائد کی گئی۔
انتظامیہ کی جانب سے اس دوران سکیورٹی کے سخت انتظامات کیے گئے ہیں۔
کراچی، لاہور، پشاور اور کوئٹہ سمیت ملک کے مختلف شہروں میں موبائل فون سروس متاثر رہی اور موٹر سائیکل کی ڈبل سواری پر پابندی عائد کی گئی۔
