جناح ہسپتال میں وارڈبوائے کی لاش برآمد’ سوالات اُٹھ گئے

لاہور(جنرل رپورٹر) جناح ہسپتال میں وارڈ بوائے کی لاش برآمد، انتظامی غفلت پر سوالات اٹھ گئے، سینٹری سپروائزر کی نااہلی کے
باعث لاش کئی دن تک ہسپتال میں پڑی رہی ۔ تفصیلات کے مطابق جناح ہسپتال کے بیسمنٹ سے وارڈ بوائے کی کئی روز پرانی لاش برآمد ہونے کے واقعے نے ہسپتال کی انتظامی نگرانی اور ملازمین کی حاضری کے نظام پر سنگین سوالات اٹھا دیے۔ پولیس کے مطابق جناح ہسپتال کے وارڈ بوائے شاہد کی لاش بیسمنٹ سے برآمد ہوئی۔ جو بظاہر 3 سے 4 روز پرانی معلوم ہوتی ہے۔ پولیس نے شواہد اکٹھے کرکے لاش پوسٹ مارٹم کے لیے منتقل کردی ہے جبکہ واقعے کی تحقیقات جاری ہیں۔ ابتدائی طور پر موت نشے کی زیادتی کے باعث ہونے کا شبہ ظاہر کیا گیا ہے تاہم موت کی حتمی وجہ پوسٹ مارٹم رپورٹ کے بعد سامنے آئے گی۔ہسپتال ذرائع کے مطابق معاملے کا تشویشناک پہلو یہ ہے کہ وارڈ بوائے شاہد کئی روز تک ڈیوٹی سے غیر حاضر رہا مگر متعلقہ انتظامی افسران اور سینٹری سپروائزر کی جانب سے اس کی غیر حاضری کو سنجیدگی سے نہیں لیا گیا۔ ذرائع کا کہنا ہے کہ غیر حاضری پر نہ بروقت وضاحت طلب کی گئی اور نہ ہی شوکاز نوٹس جاری کیا گیا۔ذرائع کے مطابق اگر متعلقہ سپروائزر اور افسران ملازم کی مسلسل غیر حاضری کی بروقت وجوہات معلوم کرتے تو ممکنہ طور پر شاہد کی لاش کئی روز تک ہسپتال کے بیسمنٹ میں لاوارث حالت میں نہ پڑی رہتی۔واقعے نے ہسپتال میں ملازمین کی حاضری، سپروائزری نظام اور انتظامی نگرانی پر سوالات کھڑے کردیے ہیں۔ سوال یہ بھی پیدا ہوتا ہے کہ ایک ملازم کی کئی روزہ غیر حاضری کے باوجود متعلقہ افسران نے اس کا نوٹس کیوں نہیں لیا اور بیسمنٹ جیسے مقام کی نگرانی کا نظام کہاں تھا۔پولیس کا کہنا ہے کہ موت کی اصل وجہ پوسٹ مارٹم رپورٹ کے بعد ہی واضح ہوگی اور تمام پہلوں سے تحقیقات کی جا رہی ہیں۔ اس حوالے سے سینٹری سپروائزر رانا داد کا کہنا تھا کہ شاید کی حاضری لیبارٹری میں لگتی تھی اس معاملے کے ساتھ اس کا کوئی تعلق نہ ہے