محکمہ آبپاشی پنجاب بڑے منصوبے میں سرکاری خزانے کو کروڑوں روپے کا چونا لگانے کا انکشاف

لاہور (خبر نگار) محکمہ آبپاشی پنجاب کے ایک بڑے منصوبے میں سرکاری خزانے کو مبینہ طور پر
کروڑوں روپے کا چونا لگانے کا انکشاف ہوا ہے، جہاں مظفرگڑھ کینال لائننگ پراجیکٹ کے تحت واٹر لاگنگ ختم کرنے کے لیے 35 سولر ٹیوب ویل نصب کیے جانے تھے، مگر الزام ہے کہ کروڑوں روپے مالیت کا یہ منصوبہ زمین پر ٹیوب ویل لگانے کے بجائے مبینہ طور پر سرکاری سامان کی فروخت اور رقم ہڑپ کرنے کی نذر ہوگیا۔ معاملہ اینٹی کرپشن اسٹیبلشمنٹ تک پہنچا تو محکمہ آبپاشی کے تین افسران گرفتار کرلیے گئے جبکہ مزید چھ ایکسینز کے خلاف بھی کارروائی کے احکامات جاری کر دیئے گئے۔ دستیاب ریکارڈ کے مطابق 35 سولر ٹیوب ویلوں کی لاگت 7 کروڑ روپے مقرر تھی اور انہیں کینال لائننگ پراجیکٹ کے دوران ان علاقوں میں نصب کیا جانا تھا جہاں واٹر لاگنگ کا مسئلہ موجود تھا۔ تاہم اینٹی کرپشن کے سامنے آنے والے الزام کے مطابق ٹیوب ویل مقررہ مقامات پر نصب ہی نہ کیے گئے بلکہ متعلقہ اہلکاروں نے مبینہ طور پر انہیں فروخت کر دیا اور سرکاری رقم میں خردبرد کی گئی۔ معاملے نے اس وقت سنگین رخ اختیار کیا جب اینٹی کرپشن مظفرگڑھ سرکل نے محکمہ آبپاشی کوٹ ادو کے ایس ڈی او محمد اجمل رضا اور سب انجینئرز توقیر رضا اور مظہر حسین کے خلاف مقدمہ درج کرکے انہیں گرفتار کیا۔ گرفتار اہلکاروں کو عدالت میں پیش کیا گیا جہاں اینٹی کرپشن کو تین روزہ جسمانی ریمانڈ دیا گیا، جبکہ تفتیشی کارروائی کا بنیادی مقصد مبینہ طور پر سرکاری خزانے کو پہنچنے والے 7 کروڑ روپے کے نقصان کی ریکوری بھی قرار دیا گیا۔ کرپشن کی مبینہ زنجیر صرف تین افسران تک محدود نہ رہی۔ محکمہ آبپاشی کی جانب سے اینٹی کرپشن کے ڈائریکٹر جنرل کو مزید چھ ایکسینز کے خلاف کارروائی کے لیے خط لکھا گیا، جس کے بعد حفیظ بلوچ، محبوب ربانی، عثمان بھٹی، عبدالوحید، عادل جاوید اور جام عمران کے خلاف بھی کارروائی کے احکامات جاری کیے گئے۔