کوہاٹ کی پولیس لائنز میں نمازِ جمعہ کے دوران مسجد کے قریب بارود سے بھری گاڑی کے دھماکے اور اس کے بعد دہشت گردوں کے حملے میں 21 افراد شہید ہوگئے، جن میں 15 پولیس اہلکار اور 6 شہری شامل ہیں۔ مختلف ذرائع کے مطابق زخمیوں کی تعداد 100 سے زائد ہے۔
پولیس کے مطابق بارود سے بھری گاڑی پرانی پولیس لائنز کے گیٹ سے ٹکرائی، جس کے بعد دھماکا ہوا اور فائرنگ شروع ہوگئی۔ حملہ آوروں نے پولیس لائنز میں داخل ہونے کی کوشش کی، تاہم پولیس اور کاؤنٹر ٹیررازم ڈیپارٹمنٹ (CTD) نے جوابی کارروائی کرتے ہوئے 6 دہشت گردوں کو ہلاک کردیا۔
دھماکے سے مسجد کا بیرونی حصہ اور قریبی عمارتوں کو نقصان پہنچا جبکہ ایک دیوار بھی منہدم ہوگئی۔ زخمیوں کو کوہاٹ کے ڈی ایچ کیو اور لیاقت میموریل اسپتال منتقل کیا گیا، جہاں ایمرجنسی نافذ کردی گئی۔
