افغانستان میں موجود دہشتگرد بے گناہ پاکستانیوں کا خون بہا رہے ہیں: طاہر اشرفی

لاہور(مانیٹرنگ ڈیسک)چیئرمین پاکستان علما کونسل حافظ طاہر محمود اشرفی نے کہا ہے کہ افغانستان میں موجود دہشت گرد بے گناہ
پاکستانیوں کا خون بہا رہے ہیں۔صوبائی دارالحکومت میں ازبکستان کے صحافیوں اور ذرائع ابلاغ کے نمائندوں سے گفتگو کرتے ہوئے حافظ طاہر محمود اشرفی کا کہنا تھا کہ قومی پیغام امن کمیٹی ملک بھر میں امن، محبت، رواداری، باہمی احترام اور قومی وحدت کے فروغ کے لیے سرگرمِ عمل ہے۔ انہوں نے کہا کہ قومی پیغام امن کمیٹی نے ملک بھر میں امن، محبت، رواداری اور بین المسالک و بین المذاہب ہم آہنگی کا پیغام عام کیا ہے۔چیئرمین پاکستان علما کونسل کا کہنا تھا کہ کمیٹی نے انتہا پسندی اور دہشت گردی کے خلاف مضبوط قومی بیانیہ اجاگر کیا، جبکہ پاکستان کے علما و مشائخ دہشت گردی اور انتہا پسندی کے خلاف واضح اور دوٹوک مقف رکھتے ہیں۔طاہر اشرفی نے کہا کہ علما و مشائخ نے خودکش حملوں، بم دھماکوں اور بے گناہ افراد کے قتل کے خلاف صفِ اول میں فتاوی دیے اور دہشت گردی کے خاتمے کے لیے بھرپور کردار ادا کیا۔