لاہور(کرائم رپو رٹر)سنٹرل پولیس آفس میں آئی جی پنجاب عبدالکریم نے پولیس ملازمین اور ان کے اہلخانہ سے ملاقات کی اور ان کے مسائل و
درخواستیں سنیں۔ آئی جی پنجاب نے مختلف درخواستوں پر متعلقہ افسران کو فوری ریلیف فراہم کرنے اور قواعد و ضوابط کے مطابق کارروائی کے احکامات جاری کیے۔ترجمان پنجاب پولیس کے مطابق مرحوم کانسٹیبل فرحان طارق کے والد نے بیٹے کے بقایاجات کی ادائیگی کی درخواست کی، جس پر آئی جی پنجاب نے ایڈیشنل آئی جی ویلفیئر اینڈ فنانس کو معاملہ زیر غور لانے کی ہدایت کی۔ ہیڈکانسٹیبل محمد افضل کی اہلیہ کے علاج معالجے کے لیے طبی مالی امداد کی درخواست پر بھی ایڈیشنل آئی جی ویلفیئر اینڈ فنانس کو ضروری اقدامات کی ہدایت کی گئی۔اسی طرح ہیڈ کانسٹیبل محمد سیفل کی طبی مالی امداد کی درخواست پر ریلیف فراہم کرنے، ٹریفک اسسٹنٹ ارسلان علی کی سرکاری رہائش کی درخواست پر معاملہ زیر غور لانے کے احکامات جاری کیے گئے۔ ترجمان کے مطابق نائب قاصد علی رضا کی ٹرانسفر سے متعلق درخواست پر ایڈیشنل آئی جی پنجاب کو ریلیف فراہم کرنے جبکہ نائب قاصد اقصیٰ جبین کی تبادلے کی درخواست پر بھی ضروری کارروائی کی ہدایات دی گئیں۔آئی جی پنجاب عبدالکریم نے ڈسپلن، ایڈمن، پروموشن اور ویلفیئر سے متعلق دیگر درخواستوں کا بھی جائزہ لیا اور متعلقہ افسران کو قواعد کے مطابق مسائل کے حل کے لیے احکامات جاری کیے۔ آئی جی پنجاب نے اس موقع پر کہا کہ پولیس ملازمین اور ان کے اہلخانہ کی فلاح و بہبود محکمہ پولیس کی ترجیحات میں شامل ہے۔
