تنازع کشمیر حل نہ ہونے کے باعث مظلوم کشمیری شدیدمشکلات کا شکار

اسلام آباد (این این آئی) آج جب دنیا بھر میں امن کا عالمی دن منایا جارہا ہے، مقبوضہ جموں و کشمیر کی صورتحال انتہائی سنگین ہے جہاں مسلسل بھارتی قبضے اور ریاستی جبر سے خوف و دہشت کی فضا قائم ہے۔کشمیر میڈیا سروس کی طرف سے آج یومِ امن کے موقع پر جاری کی گئی ایک رپورٹ میں کہا گیا ہے کہ گزشتہ 79 برس سے مظلوم کشمیریوں کو بھارتی فورسزکی طرف سے شدید سیاسی ناانصافی، ہراسانی اور مظالم کا سامنا ہے۔ رپورٹ میں کہا گیا ہے کہ بھارتی فورسز اور ایجنسیاں مقبوضہ جموں وکشمیرمیں تشدد، گرفتاریوں اور گھروں پر چھاپوں سمیت ظالمانہ ہتھکنڈوں کا استعمال کر رہی ہیں۔ بھارت گزشتہ کئی دہائیوں سے مقبوضہ جموں و کشمیر میں تحریک آزادی کو دبانے اور کشمیریوں کو جدوجہد آزادی ترک کرنے پر مجبور کرنے کے لیے ریاستی دہشت گردی کو باقاعدہ پالیسی کے طور پر استعمال کر رہا ہے تاہم وہ اپنے مذموم عزائم میں ناکام رہا ہے۔ دفعہ 370 اور35 اے کی منسوخی کے بعد مقبوضہ جموں وکشمیر پر سخت فوجی محاصرہ مسلط کر دیا گیا جبکہ راشٹریہ سوائم سیوک سنگھ کی پشت پناہی سے قائم بھارتیہ جنتا پارٹی حکومت نے خطے کو عملا ایک حراستی کیمپ میں تبدیل کر دیا ہے جہاں آر ایس ایس کے ہندو تواایجنڈے کے تحت نصابِ تعلیم میں تبدیلیاں کرکے کشمیری ثقافت اور تاریخ کو بھی نشانہ بنایا جارہا ہے۔ بی جے پی حکومت نے حریت کانفرنس کی اعلی قیادت، کارکنوں، خواتین، نوجوانوں اور انسانی حقوق کے کارکنوں سمیت 3,000سے زائد کشمیریوں کو بھارت اورمقبوضہ جموں وکشمیر کی مختلف جیلوں میں غیر قانونی طور پر نظربند کر رکھا ہے تاکہ سیاسی آوازوں کو خاموش کیا جائے۔ بھارتی فوج، پولیس، پیراملٹری فورسز اور بدنام زمانہ تحقیقاتی اداروں این آئی اے اورایس آئی اے کے اہلکاروں نے رواں سال مختلف علاقوں میں پرتشدد محاصروں اور تلاشی کی کارروائیوں اور گھروں پر چھاپوں کے دوران 4,700 سے زائد کشمیریوں کو گرفتارکیا اور ان سے پوچھ گچھ کی ۔گرفتار افراد میں حریت رہنما حیات احمد بٹ، فاروق احمد توحیدی، غلام محمد خان سوپوری،انسانی حقوق کے کارکن محمد احسن اونتو، علی گڑھ مسلم یونیورسٹی کے طلبا یاسر کشمیری، شہباز اور دیگر شامل ہیں۔