ڈاکٹروں کیخلاف ایف بی آر کا گھیرا تنگ’ٹیکس معاملات کی چھان بین کی تیاریاں

لاہور (جنرل رپورٹر) ڈاکٹروں کے خلاف ایف بی آر کا گھیرا تنگ، ٹیکس معاملات کی چھان بین اور فہرستیں مرتب کرنے کی تیاریاں، ایف بی آر پالیسیوں پر ڈاکٹروں کے تحفظات شدت اختیار کر گئے۔ پاکستان میڈیکل ایسوسی ایشن نے احتجاجا 30 ستمبر کو ملک بھر میں طبی سہولیات بند رکھنے کا اعلان کر دیا۔ پاکستان میڈیکل ایسوسی ایشن نے30 ستمبر2026 ء کو ملک بھر میں تمام طبی سہولیات مکمل طور پر بند رکھنے کا اعلان کر دیا۔ پی ایم اے کے مطابق تمام صوبائی قیادت سے مشاورت کے بعد یہ فیصلہ کیا گیا، تمام صوبوں میں طبی اداروں کو 30 ستمبر کو مکمل بند رکھنے کی ہدایت جاری کر دی گئی ہے، جبکہ مقامی طبی تنظیموں اور میڈیکل سوسائٹیز کو بھی احتجاج میں شامل کرنے کے لیے رابطے شروع کر دیئے گئے ہیں۔ پی ایم اے نے صوبائی و مقامی قیادت کو اسی روز پریس کانفرنسز منعقد کرنے کی ہدایت بھی کی ہے۔ دوسری جانب ذرائع کا کہنا ہے کہ ڈاکٹروں کو ایف بی آر کے ریڈار پر لانے کے لیے فہرستیں مرتب کرنے اور ٹیکس معاملات کی جانچ پڑتال سخت کرنے کی تیاریاں جاری ہیں۔ ڈاکٹرز کا موقف ہے کہ ٹیکس قوانین پر عملدرآمد ضروری ہے، تاہم طبی شعبے پر عائد ٹیکس پالیسیوں میں زمینی حقائق کو مدنظر رکھا جائے جبکہ حکومت اور ڈاکٹر برادری کے درمیان مذاکرات نہ ہونے کی صورت میں 30 ستمبر کا احتجاج مریضوں کے لیے بھی مشکلات پیدا کر سکتا ہے۔