لاہور میں انسداد پولیو مہم چھٹے روز بھی جاری رہی’ ٹیمیں قطرے پلانے میں مصروف

لاہور (جنرل رپورٹر) لاہور میں انسداد پولیو مہم چھٹے روز بھی جاری رہی، پولیو ٹیمیں گھر گھر جاکر بچوں کو انسداد پولیو ویکسین کے قطرے پلانے میں مصروف رہیں۔ انسداد پولیو پروگرام کے مطابق لاہور میں مجموعی طور پر21 لاکھ سے زائد بچوں کو پولیو سے بچائو کے قطرے پلائے جاچکے ہیں جبکہ مہم اب کیچ اپ مرحلے میں داخل ہو گئی ہے۔ حکام کے مطابق کیچ اپ کے دوران ان بچوں پر خصوصی توجہ دی جائے گی جو کسی وجہ سے پولیو ویکسین سے محروم رہ گئے۔ ایسے بچوں کو قریبی سرکاری ہسپتال یا ڈسپنسری سے بھی پولیو کے قطرے پلائے جاسکتے ہیں۔ والدین ویکسین سے محروم بچوں کی اطلاع 1166 پر دے سکتے ہیں۔ انسداد پولیو پروگرام نے کہا ہے کہ مہم کی کامیابی والدین کے تعاون سے ہی ممکن ہے۔ دریں اثنا انسداد پولیو پروگرام کے سربراہ خالد پرویز نے وفات پانے والی پولیو ورکر کے گھر جاکر لواحقین سے ملاقات کی اور اظہارِ افسوس کیا۔ انہوں نے کہا کہ دکھ کی اس گھڑی میں پولیو ورکر کے لواحقین کے ساتھ کھڑے ہیں اور ان کی ہر ممکن امداد کی جائے گی۔