ٹیکس دہندگان پر ایف آئی آرز درج کرنے کیخلاف آئینی درخواستیں خارج

لاہور( این این آئی)لاہور ہائیکورٹ نے ٹیکس دہندگان کے خلاف ایف آئی آرز کے اندراج سے متعلق آئینی درخواستیں خارج کردیں۔لاہور ہائیکورٹ کے جسٹس حسن مخدوم اور جسٹس خالداسحاق نے محمود اخترسمیت دیگرکی درخواستوں پرتحریری فیصلہ جاری کیا۔عدالت نے قراردیاکہ درخواستیں بے بنیادہونے کی بنیاد پر خارج کی جاتی ہیں، تفتیشی ایجنسی اور متعلقہ عدالت قانون،دستیاب مواد اور شواہد کی روشنی میں فیصلہ کریں۔فیصلے میں واضح کیاگیاکہ ہائیکورٹ کاموجودہ فیصلہ کسی عدالت یا تفتیشی ایجنسی پرمنفی اثر نہیں ڈالے گا،اس مرحلے پر یہ فیصلہ نہیں کیا جا رہا کہ درخواست گزاروں پر ٹیکس واجب الادا ہے یا نہیں،ٹیکس کی ادائیگی سے متعلق فیصلہ متعلقہ فورم شواہد کی بنیاد پر کرے گا۔درخواست گزاروں نے ڈی جی انٹیلی جنس اینڈ انویسٹی گیشن ان لینڈ ریونیو کی کارروائی کو چیلنج کیا تھا۔ درخواست گزاروں کا موقف تھا کہ ٹیکس واجب الادا نہ ہونے پرنوٹسز جاری کیے گئے،مبینہ جواب دینے کے بعد ایف آئی آرز درج کی گئیں اورمعاملہ انکم ٹیکس ٹربیونل میں زیر سماعت ہے۔درخواست گزاروں کے مطابق ٹیکس افسر کے سامنے معاملہ زیر سماعت ہونے کے دوران ایف آئی آرز کا اندراج غیرقانونی اور بے بنیاد ہے۔