ٹریفک سگنلز پر پیشہ ور گداگروں کے ڈیرے، شہریوں کی مشکلات میں مسلسل اضافہ

لاہور(محمد کامران سے) ٹریفک سگنلز پر پیشہ ور گداگروں کے ڈیرے، شہریوں کی مشکلات میں مسلسل اضافہ، متعلقہ پولیس و ٹریفک پولیس کی مبینہ عدم توجہی نے صورتحال کو سنگین بنا دیا۔ لاہور کی اہم شاہراہوں، مصروف چوراہوں، بازاروں اور کمرشل علاقوں میں بھکاریوں کے منظم گروہ شہریوں کے لیے وبالِ جان بن گئے۔ سروے کے مطابق متعدد مصروف سگنلز پر اشارہ سرخ ہوتے ہی مرد، خواتین،  بزرگ، بچے اور خواجہ سرا گاڑیوں کے درمیان پہنچ جاتے ہیں، جبکہ بعض مقامات پر خواتین معصوم بچوں کو اٹھائے اور بچوں کے گروہ گاڑیوں کے شیشے کھٹکھٹاتے دکھائی دیتے ہیں۔ اس صورتحال کے باعث نہ صرف شہریوں کو شدید کوفت کا سامنا ہے بلکہ ٹریفک کی روانی بھی متاثر ہونے کی شکایات سامنے آ رہی ہیں۔ ڈی ائی جی اپریشن فیصل کامران کی ہدایت کے باوجود گداگروں کے خلاف آپریشن میں نرمی کیوں ہو رہی ہے ۔شہریوں کا کہنا ہے کہ ٹریفک پولیس ٹولیاں بنائے چالانوں پر زور کم دے اور سگنلز پر بھکاریوں پر بھی نظر رکھے، خصوصا کم عمر بچوں کا چلتی ٹریفک کے درمیان آنا انتہائی تشویشناک ہے۔ شہریوں نے سوال اٹھایا ہے کہ اگر اہم ترین ٹریفک سگنلز پر یہ سرگرمیاں کھلے عام جاری رہیں تو متعلقہ اداروں کی مانیٹرنگ اور ذمہ داری کہاں ہے؟ بعض مقامات پر چھوٹی موٹی اشیا فروخت کرنے کے نام پر نوجوان لڑکیوں کے سڑکوں پر کھڑے ہونے کی شکایات بھی سامنے آئی ہیں۔ شہریوں نے مطالبہ کیا ہے کہ ایسی شکایات کی مکمل اور غیرجانبدارانہ تحقیقات کی جائیں اور اگر کسی غیرقانونی سرگرمی میں ملوث عناصر پائے جائیں تو قانون کے مطابق کارروائی عمل میں لائی جائے۔ شہریوں نے اعلی حکام،متعلقہ پولیس و ٹریفک پولیس اور انتظامیہ سے مطالبہ کیا ہے کہ مصروف سگنلز پر بھکاریوں کے خلاف مثر اور مستقل آپریشن کیا جائے، کم عمر بچوں کو سڑکوں پر بھیک منگوانے والے عناصر کے خلاف کارروائی کی جائے اور ٹریفک اہلکاروں کی ڈیوٹی پر موجودگی اور کارکردگی کی بھی سخت مانیٹرنگ کی جائے۔ شہریوں کا کہنا ہے کہ لاہور جیسے بڑے شہر میں ٹریفک سگنلز کا نظم و ضبط محض اشارے چلانے تک محدود نہیں ہونا چاہیے؛ سڑکوں پر شہریوں کے تحفظ، ٹریفک کی روانی اور قانون کی عملداری بھی متعلقہ اداروں کی بنیادی ذمہ داری ہے۔