اوورسیز پاکستانیوں کیلئے مفت قانونی خدمات کا معاہدہ

لاہور (این این آئی) اوورسیز پاکستانیز کمیشن پنجاب اور پنجاب بار کونسل نے اوورسیز پاکستانیوں کو درپیش قانونی مسائل کے حل اور انہیں مفت قانونی سہولیات کی فراہمی کیلئے باہمی تعاون پر اتفاق کیا ہے جس کے تحت پنجاب کے تمام اضلاع میں سول، فوجداری، خاندانی اور جائیداد سے متعلق مقدمات میں بلا معاوضہ قانونی خدمات فراہم کی جائیں گی جبکہ مقدمات کی جلد سماعت اور بروقت فیصلوں کیلئے بھی ممکنہ تعاون کیا جائے گا، فاسٹ ٹریک انصاف سے متعلق معلوماتی مواد بھی تیار کیا جائے گا اور درخواست گزار کو اپنی پسند کا وکیل منتخب کرنے کا حق حاصل ہوگا۔ صوبائی وزیر’ وائس چیئرمین اوورسیز پاکستانیز کمیشن پنجاب اور چیئرمین ایسوسی ایشن آف پاکستانی لائرز برطانیہ بیرسٹر امجد ملک کی دعوت پر پنجاب بار کونسل کے وفد نے برطانیہ کا دورہ کیا۔ وفد کی قیادت سابق چیئرمین ایگزیکٹو کمیٹی فخر حیات اعوان نے کی جبکہ وفد میں رائے اشرف، چوہدری امجد پرویز، مراد بھٹی، اعجاز احمد بلوچ اور کاشف اقبال مغل شامل تھے۔ ملاقات میں اوورسیز پاکستانیوں کو درپیش قانونی مسائل، ان کے موثرحل اور دونوں اداروں کے درمیان تعاون مزید مضبوط بنانے پر تفصیلی تبادلہ خیال کیا گیا۔ طے پایا کہ او پی سی سے موصول ہونے والے قانونی معاملات پنجاب بار کونسل کو بھجوائے جائیں گے جہاں ماہر وکلا ء مفت قانونی مشاورت، رہنمائی اور ضرورت کے مطابق قانونی نمائندگی فراہم کریں گے۔