ملائیشیا کے سابق وزیراعظم کی اہلیہ انتقال کرگئیں’صدرزرداری کااظہار تعزیت

کوالالمپور (این این آئی) ملائیشیا کے طویل  عرصے تک وزیراعظم رہنے والے مہاتیر محمد کی اہلیہ سیتی حسمہ محمد علی 100 برس کی عمر میں انتقال کر گئیں۔ ان کے انتقال کی تصدیق پیر کو مہاتیر محمد کے دفتر کی جانب سے کی گئی۔ سیتی حسمہ نے نیشنل ہارٹ انسٹیٹیوٹ میں آخری سانس لی۔ ان کے بیٹے اور کاروباری شخصیت مخزانی مہاتیر نے بھی ان کے انتقال کی تصدیق کی۔ فوری طور پر ان کی موت کی مزید تفصیلات سامنے نہیں آئیں۔ سیتی حسمہ اور مہاتیر محمد کی ملاقات 1940ء کی دہائی کے آخر میں سنگاپور میں میڈیکل کی تعلیم کے دوران ہوئی تھی۔ دونوں نے اگست میں اپنی شادی کی 70ویں سالگرہ منائی تھی۔ اس جوڑے کے سات بچے ہیں، جن میں مخزانی مہاتیر، سماجی کارکن مرینا مہاتیر اور سیاستدان مختارز مہاتیر شامل ہیں۔ سیتی حسمہ ملائیشیا کی عوام میں بھی ایک نمایاں شخصیت رہی ہیں۔ وہ خاص طور پر صحت عامہ، خاندانی منصوبہ بندی اور دیگر سماجی شعبوں سے متعلق امور کے لیے کام کرتی رہیں۔ سیاسی سفر کے دوران نہ صرف ان کی شریکِ حیات کے طور پر کردار ادا کیا بلکہ صحت اور سماجی بہبود سے متعلق معاملات میں بھی اپنی الگ شناخت قائم کی۔