باگڑیاں: 365 کنال وقف اراضی پر قبضہ برسوں گزرنے پر بھی ختم نہ ہوسکا

لاہور (خبر نگار) محکمہ اوقاف کے سرکل نمبر 5 کے علاقے باگڑیاں، گرین ٹائون میں365 کنال قیمتی وقف اراضی پر قبضوں کا بھوت کئی برس گزرنے کے باوجود ختم نہ ہوسکا، چند کنال اراضی کے سوا بیشتر رقبہ مبینہ طور پر قبضہ مافیا کے شکنجے میں ہونے کا انکشاف ہوا ہے۔ کروڑوں بلکہ اربوں روپے مالیت کی وقف پراپرٹی واگزار نہ کروائے جانے پر محکمہ اوقاف کی اعلی انتظامیہ کی کارکردگی پر سنگین سوالات اٹھنے لگے ہیں۔ ذرائع کے مطابق باگڑیاں گرین ٹائون میں محکمہ اوقاف کی365 کنال وقف اراضی موجود ہے جس کے ایک بڑے حصے پر مبینہ طور پر غیر قانونی قابضین کا تسلط برقرار ہے۔ ذرائع کا کہنا ہے کہ سابق دور میں محکمہ اوقاف کے بعض ملازمین کو باگڑیاں میں پلاٹ رہائش کے لیے الاٹ کیے گئے تھے، تاہم 2004 میں عدالت نے مذکورہ الاٹمنٹس منسوخ کرتے ہوئے قرار دیا تھا کہ وقف پراپرٹی کو اس انداز میں فروخت یا منتقل نہیں کیا جاسکتا، جس کے بعد الاٹمنٹس ختم ہوگئیں۔ ذرائع کے مطابق عدالتی فیصلے کے بعد بھی معاملہ ختم نہ ہوا بلکہ مبینہ قبضہ مافیا نے جعلی اور مشکوک دستاویزات کا سہارا لے کر قیمتی وقف اراضی پر قبضے قائم کیے اور بعض جائیدادیں آگے فروخت تک کر دی گئیں۔ حیران کن امر یہ ہے کہ برسوں گزرنے کے باوجود محکمہ اوقاف کا متعلقہ انتظامی نظام مبینہ طور پر اس قیمتی وقف اثاثے کو مکمل طور پر واگزار کروانے میں ناکام دکھائی دیتا ہے۔365 کنال وقف اراضی میں سے کتنے رقبے پر قبضہ ہے، کتنی زمین واگزار کروائی گئی اور کتنے قابضین کے خلاف کارروائی ہوئی؟ ان بنیادی سوالات کے واضح جوابات تاحال سامنے نہ آنے سے محکمہ اوقاف کی نگرانی اور ریونیو مینجمنٹ پر بھی سوالات اٹھ رہے ہیں۔ ذرائع کا کہنا ہے کہ اگر 2004 میں عدالت کی جانب سے الاٹمنٹس منسوخ کردی گئی تھیں تو اس کے بعد وقف اراضی پر قبضے کیسے برقرار رہے، مبینہ جعلی کاغذات کیسے تیار ہوئے، جائیدادیں آگے کس بنیاد پر منتقل یا فروخت کی گئیں اور محکمہ اوقاف نے اتنے طویل عرصے کے دوران قبضہ واگزار کرانے کے لیے موثر کارروائی کیوں نہ کی؟ یہ وہ سوالات ہیں جن کا جواب محکمہ اوقاف کی اعلی انتظامیہ کو دینا ہوگا۔ وقف املاک محکمہ اوقاف کی ذاتی ملکیت نہیں بلکہ ایک امانت ہیں، اس لیے قیمتی وقف اراضی پر مبینہ قبضے برقرار رہنا صرف انتظامی غفلت کا معاملہ نہیں بلکہ وقف اثاثوں کے تحفظ کے پورے نظام کی کارکردگی پر بڑا سوالیہ نشان ہے۔ ذرائع نے مطالبہ کیا ہے کہ باگڑیاں کی365 کنال وقف اراضی کا مکمل ریکارڈ، تمام الاٹمنٹس، عدالتی فیصلے، انتقالات، رجسٹریاں اور موجودہ قابضین کا ریکارڈ سامنے لایا جائے اور جعلی دستاویزات تیار کرنے، وقف اراضی پر قبضے اور اسے آگے منتقل کرنے میں ملوث عناصر کے خلاف بلاامتیاز قانونی کارروائی کی جائے۔