اسلام آباد(آئی این پی )محکمہ موسمیات نے ملک کے بیشتر علاقوں میں آئندہ 24 گھنٹوں کے دوران موسم خشک رہنے کی پیشگوئی کی ہے تاہم گلگت بلتستان، چترال اور دیر کے بعض علاقوں میں تیز ہوائوں اور گرج چمک کے ساتھ ہلکی بارش کا امکان ہے۔ محکمہ موسمیات کے مطابق ملک کے بیشتر علاقوں میں موسم خشک رہے گا، جبکہ میدانی علاقوں میں دن کے اوقات میں گرمی کی شدت برقرار رہنے کی توقع ہے،بالائی اور شمالی علاقوں میں مطلع جزوی طور پر ابر آلود رہ سکتا ہے۔ اسلام آباد اور گردونواح میں موسم خشک رہنے کا امکان ہے،خیبر پختونخوا کے بیشتر علاقوں میں بھی موسم خشک رہے گا، تاہم بالائی اضلاع میں مطلع جزوی ابر آلود رہنے کے ساتھ چترال اور دیر میں بعض مقامات پر تیز ہواں اور گرج چمک کے ساتھ ہلکی بارش متوقع ہے۔ پنجاب کے بیشتر علاقوں میں موسم خشک جبکہ میدانی اضلاع میں دن کے دوران موسم گرم رہنے کا امکان ہے، سندھ کے بیشتر اضلاع میں موسم گرم اور خشک رہے گا، تاہم ساحلی علاقوں میں مطلع جزوی ابر آلود رہ سکتا ہے۔ بلوچستان کے بیشتر اضلاع میں بھی موسم گرم اور خشک رہنے کی پیشگوئی کی گئی ہے، جبکہ کشمیر اور گلگت بلتستان میں مطلع جزوی ابر آلود رہنے کے علاوہ گلگت بلتستان کے بعض مقامات پر تیز ہواں اور گرج چمک کے ساتھ ہلکی بارش ہو سکتی ہے۔ دوسری جانب ملک میں داخل ہونے والے مغربی سلسلے کے زیر اثر کراچی میں آئندہ 3 روز کے دوران کراچی کا موسم نسبتا گرم اور مرطوب رہنے کا امکان ہے۔محکمہ موسمیات کی ارلی وارننگ سینٹر پیش گوئی کے مطابق زیادہ سے زیادہ درجہ حرارت 33 تا 35 ڈگری کے درمیان ریکارڈ ہو سکتا ہے۔کراچی میں سمندری ہوائوں کے علاوہ مغربی سمت کی ہوائیں بھی چل سکتی ہیں۔صوبے کے دیگر اضلاع میں بھی موسم گرم و مرطوب رہ سکتا ہے تاہم جامشورو میں گرج چمک کے ساتھ بارش ہونے کی توقع ہے۔
