لاہور (جنرل رپورٹر)پنجاب کے سرکاری سکولوں کی بہتری کے لیے گریڈز منصوبے پر اہم پیش رفت سامنے آ گئی ہے۔سکول ایجوکیشن ڈیپارٹمنٹ نے گریڈز منصوبے کیلئے 5 ارب 80 کروڑ روپے جاری کرنے کی درخواست کر دی ہے۔دستاویزات کے مطابق رواں مالی سال میں 5 ارب 80 کروڑ روپے کے فنڈز جاری کرنے کی استدعا کی گئی ہے، جبکہ سالانہ ترقیاتی پروگرام میں بھی منصوبے کیلئے اتنی ہی رقم مختص ہے۔ دستاویزات کے مطابق فنڈز کی فراہمی کا معاملہ منظوری کیلئے پی اینڈ ڈی بورڈ کو بھجوا دیا گیا ہے۔ گریڈز منصوبے کی مجموعی لاگت 41 ارب 67 کروڑ روپے سے زائد ہے۔منصوبے کے تحت پنجاب بھر میں 5 ہزار 438 اضافی کلاس رومز تعمیر کیے جائیں گے، جبکہ پنجاب ایجوکیشن فانڈیشن کے سکولوں میں 5 لاکھ نئے بچوں کے داخلے کا ہدف مقرر کیا گیا ہے۔ اس کے علاوہ ایک لاکھ 27 ہزار اساتذہ کو جدید تدریسی طریقوں کی تربیت دی جائے گی۔
