امریکا نے متحدہ عرب امارات کو تقریباً 1.041 ارب ڈالر مالیت کے دفاعی سازوسامان کی ممکنہ فروخت کی منظوری دے دی ہے۔ امریکی محکمہ خارجہ کے مطابق اس پیکج میں 10 ہزار تک Advanced Precision Kill Weapon System-II (APKWS-II) گائیڈنس سیکشنز شامل ہیں۔ امریکی حکام کے مطابق یہ نظام غیر رہنمائی شدہ راکٹوں کو درست نشانے والے ہتھیاروں میں تبدیل کرنے کی صلاحیت رکھتا ہے اور اسے ڈرونز سمیت مختلف فضائی اہداف کے خلاف استعمال کیا جا سکتا ہے۔ امریکی محکمہ خارجہ کا کہنا ہے کہ مجوزہ فروخت سے متحدہ عرب امارات کی موجودہ اور مستقبل کے خطرات سے نمٹنے کی دفاعی صلاحیت بہتر ہوگی، جبکہ امریکی افواج کے ساتھ اس کی عسکری مطابقت بھی مضبوط ہوگی۔ واشنگٹن کے مطابق یہ معاہدہ امریکا کے خارجہ پالیسی اور قومی سلامتی کے مقاصد میں بھی معاون ثابت ہوگا۔ یہ اعلان ایسے وقت میں سامنے آیا ہے جب خطے میں ایران کے ساتھ جاری جنگ کے باعث متحدہ عرب امارات سمیت خلیجی ممالک کو میزائل اور ڈرون حملوں کا سامنا رہا ہے۔ اسی سلسلے میں امریکا نے کویت کیلئے 40 کروڑ ڈالر کے پیٹریاٹ میزائلوں کی مرمت اور واپسی کی خدمات کی فروخت بھی منظور کی ہے۔ امریکی محکمہ خارجہ نے مصر کیلئے بھی تقریباً 83 کروڑ 20 لاکھ ڈالر کے جیولن میزائل سسٹمز کی ممکنہ فروخت کی منظوری دی، جس کے بعد مصر، کویت اور امارات کیلئے منظور کیے گئے ممکنہ دفاعی معاہدوں کی مجموعی مالیت تقریباً 2.27 ارب ڈالر بنتی ہے۔
امریکا نے متحدہ عرب امارات کیلئے ایک ارب ڈالر کے ہتھیاروں کی فروخت منظور کرلی
