10ویں نیشنل روڈ سائیکلنگ چیمپئن شپ 2026 کراچی میں 9 سے 11 اکتوبر تک منعقد ہوگی۔ چیمپئن شپ پاکستان سائیکلنگ فیڈریشن کے زیرِ اہتمام ہوگی، جس میں ملک بھر سے محکمانہ، صوبائی اور فیڈریشن سے منسلک ٹیمیں شرکت کریں گی۔
پاکستان سائیکلنگ فیڈریشن کے مطابق چیمپئن شپ میں مردوں اور خواتین سمیت مختلف کیٹیگریز کے سائیکلسٹ حصہ لیں گے۔ ایونٹ میں نمایاں کارکردگی دکھانے والے کھلاڑیوں کو آئندہ ایشین روڈ سائیکلنگ چیمپئن شپ کیلئے پاکستان کی قومی ٹیم میں شامل کرنے کیلئے زیرِ غور لایا جائے گا۔
فیڈریشن کے صدر سید اظہر علی شاہ کے مطابق قومی چیمپئن شپ کے ذریعے بہترین ٹیلنٹ کو میرٹ کی بنیاد پر منتخب کیا جائے گا، جبکہ منتخب سائیکلسٹ کیلئے خصوصی تربیتی کیمپ بھی منعقد کیا جائے گا۔
خیبرپختونخوا سائیکلنگ ایسوسی ایشن نے بھی چیمپئن شپ کیلئے اپنی ٹیم کا اعلان کردیا ہے، جس میں ایلیٹ، انڈر 23 اور جونیئر کیٹیگریز کے مرد و خواتین سائیکلسٹ شامل ہیں۔
کراچی میں 10ویں نیشنل روڈ سائیکلنگ چیمپئن شپ 9 اکتوبر سے ہوگی
