لاہور (جنرل رپورٹر)ڈائریکٹر جنرل انٹرنیشنل لیبر آرگنائزیشن (آئی ایل او)گلبرٹ ایف ہونگبو نے کہا ہے کہ مزدور اور صنعت کار ملکی معیشت اور ترقی کےمشترکہ شراکت دار ہیں، مزدوروں کی فلاح و بہبود حکومت، صنعت اور ورکرز کی مشترکہ ذمہ داری ہے، جبکہ صنعتی امن اور پائیدار معاشی ترقی کیلئے فریقین کے درمیان مضبوط روابط ناگزیر ہیں۔ گلبرٹ ایف ہونگبو نے یہ بات اپنے ایک روزہ دورہ لاہور کے دوران ملت ٹریکٹرز لمیٹڈ کے دورے اور پاکستان یونائیٹڈ ورکرز فیڈریشن کے ہیڈ آفس گڑھی شاہو میں منعقدہ سوشل کنٹیکٹ ڈائیلاگ سے خطاب کرتے ہوئے کہی۔ ان کے ہمراہ وفاقی وزیر برائے اوورسیز پاکستانی چوہدری سالک حسین، وفاقی وزیر رانا تنویر حسین، صوبائی وزیر لیبر محمد منشا اللہ بٹ، سیکرٹری لیبر پنجاب دانش افضال اور ڈائریکٹر جنرل لیبر ویلفیئر سیدہ کلثوم حئی سمیت دیگر حکام اور صنعت کار موجود تھے۔ ملت ٹریکٹرز پہنچنے پر چیئرمین سکندر مصطفی خان نے آئی ایل او کے ڈائریکٹر جنرل کا استقبال کیا، جبکہ چیف ایگزیکٹو آفیسر راحیل اصغر نے انہیں ٹریکٹرز اسمبلی پلانٹ کے مختلف شعبہ جات اور پیداواری سرگرمیوں کے بارے میں بریفنگ دی۔ گلبرٹ ایف ہونگبو نے پلانٹ کے مختلف حصوں کا دورہ کیا اور پیداواری عمل، ورکرز کی سہولیات اور پیشہ ورانہ صحت و سلامتی کے انتظامات کا جائزہ لیا۔ اس موقع پر محنت کشوں سے خطاب کرتے ہوئے آئی ایل او کے ڈائریکٹر جنرل نے پنجاب حکومت کی جانب سے ورکرز کی فلاح و بہبود کیلئے کیے جانے والے اقدامات کو سراہا۔ انہوں نے کہا کہ پاکستان کا دورہ ان کیلئے خوشی کا باعث ہے اور وہ ورکرز کیلئے فراہم کی جانے والی سہولیات، پیشہ ورانہ صحت و سلامتی اور فلاحی اقدامات سے متاثر ہوئے ہیں۔انہوں نے کہا کہ آئی ایل او دنیا بھر میں محنت کشوں کے حقوق اور فلاح و بہبود کے فروغ کیلئے اپنا کردار جاری رکھے گا۔ انہوں نے ورکرز کی مہارتوں میں اضافے اور انہیں بدلتی ہوئی صنعتی ضروریات کے مطابق تربیت فراہم کرنے کی ضرورت پر بھی زور دیا۔ بعد ازاں پاکستان یونائیٹڈ ورکرز فیڈریشن کے ہیڈ آفس گڑھی شاہو میں ویب کوپ کے زیراہتمام صنعت کاروں اور مزدور نمائندوں کے درمیان سوشل کنٹیکٹ ڈائیلاگ منعقد ہوا۔ اس موقع پر گلبرٹ ایف ہونگبو نے کہا کہ صنعتی تعلقات کو بہتر بنانے اور معاشی ترقی کو پائیدار بنانے کیلئے ورکرز اور صنعت کاروں کے درمیان باہمی اعتماد اور مسلسل مکالمہ ضروری ہے۔ ڈی جی آئی ایل او نے کہا کہ پاکستان نے آئی ایل او کی گورننگ باڈی میں ہمیشہ فعال کردار ادا کیا ہے اور وہ مزدوروں کے حقوق اور فلاح و بہبود کے حوالے سے مزید اہم کردار ادا کرسکتا ہے۔ وفاقی وزیر چوہدری سالک حسین اور پاکستان یونائیٹڈ ورکرز فیڈریشن کے عہدیداران نے گلبرٹ ایف ہونگبو کی لاہور آمد کا خیرمقدم کرتے ہوئے ان کے دورے پر شکریہ ادا کیا۔ تقریب کے اختتام پر ڈی جی آئی ایل او کو تعریفی شیلڈ پیش کی گئی۔ اپنے دورے کے اختتامی مرحلے میں گلبرٹ ایف ہونگبو نے آئی ایل او وفد کے ہمراہ مزار اقبال پر حاضری دی، پھولوں کی چادر چڑھائی اور شاعر مشرق علامہ محمد اقبال کو خراج عقیدت پیش کیا۔ وفد نے تاریخی بادشاہی مسجد کا بھی دورہ کیا اور مسجد کے مختلف حصوں سمیت مغلیہ دور کے فن تعمیر کا مشاہدہ کیا۔ قبل ازیں ڈی جی آئی ایل او لاہور پہنچے تو صوبائی وزرا محمد منشا اللہ بٹ اور ملک صہیب احمد بھرتھ، سیکرٹری لیبر دانش افضال اور ڈی جی لیبر ویلفیئر سیدہ کلثوم حئی نے لاہور ایئرپورٹ پر ان کا استقبال کیا۔
