لاہور ایجوکیشن اتھارٹی کا سکولوں میں جعلی داخلوں پر سخت اقدام

لاہور (جنرل رپورٹر) لاہور ایجوکیشن اتھارٹی نے سکولوں میں جعلی انرولمنٹ کے معاملے پر سخت اقدام کرتے ہوئے تمام سکول سربراہان سے موجودہطلبہ کی انرولمنٹ کا سرٹیفکیٹ بطور بیانِ حلفی طلب کر لیا ہے جسے متعلقہ ایجوکیشن آفیسر سیکنڈری کے پاس جمع کرانا ہوگا۔ اتھارٹی نے واضح کیا ہے کہ کسی بھی سکول میں جعلی انرولمنٹ ثابت ہونے پر متعلقہ سربراہ کو ذمہ دار ٹھہرایا جائے گا اور اس کے خلاف کارروائی کی جائے گی۔ تاہم جعلی انرولمنٹ روکنے کے لیے بیانِ حلفی لینے کا فیصلہ محکمہ تعلیم کے نگرانی کے نظام پر بھی سوالات اٹھاتا ہے۔ اگر سکولوں میں طلبہ کی فرضی تعداد درج کرکے داخلوں کے اہداف پورے کرنے کی شکایات سامنے آرہی ہیں تو یہ دیکھنا ضروری ہے کہ انرولمنٹ کے اعدادوشمار کی تصدیق کا موجودہ نظام کس حد تک موثر ہے اور اس سے قبل ایسی بے ضابطگیوں کی روک تھام کیوں نہ ہو سکی۔ ذرائع کے مطابق لاہور ایجوکیشن اتھارٹی نے سرکاری سکولوں کو31 اکتوبر تک داخلوں میں اضافہ کرنے کا ہدف دے رکھا ہے جبکہ اطلاعات ہیں کہ بعض سکولوں میں مقررہ ہدف پورا کرنے کے لیے طلبہ کی جعلی انرولمنٹ کی گئی۔ ایسے میں سکول سربراہان سے حلف نامے طلب کرنا اس امر کی نشاندہی کرتا ہے کہ داخلوں کے اہداف اور زمینی حقائق کے درمیان فرق کی جانچ پڑتال ناگزیر ہو چکی ہے۔