زرعی شعبے کی بہتری اور مشکلات کا ازالہ وقت کی اہم ضرورت سردار سلیم حیدر

فتح جنگ (بیورو رپورٹ)گورنر پنجاب سردار سلیم حیدر خان نے کہا ہے کہ کسانوں کو درپیش مسائل و مشکلات کے حل، زرعی ترقی کے فروغ اور کاشتکاروں کو ریلیف فراہم کرنے کے لیے ٹھوس، مؤثر اور انقلابی اقدامات کی ضرورت ہے۔ زراعت ملکی معیشت میں ریڑھ کی ہڈی کی حیثیت رکھتی ہے اور کسان خوشحال ہوگا تو ملک کی معیشت مضبوط ہوگی۔ کاشتکاروں کو درپیش مشکلات دور کیے بغیر زرعی شعبے کو ترقی کی راہ پر گامزن کرنا ممکن نہیں۔ان خیالات کا اظہار انہوں نے گورنر ہاؤس پیپلز پارٹی کسان ونگمیں پنجاب کے قائم مقام صدر آصف حیات خان سے ملاقات کے دوران گفتگو کرتے ہوئے کیا۔ اس موقع پرملک ظفری حطار،ملک سائیں عاقب علی،سردار تیمور خان ہستال،ڈاکٹر طارق ملال اور پی ایس او ٹو گورنر سردار محمد علی خان آف ملال بھی موجود تھے خان آصف حیات خان نے گورنر پنجاب کو کسانوں کو درپیش مختلف مسائل سے آگاہ کیا اور بتایا کہ کھاد، بیج، ڈیزل اور زرعی مداخل کی قیمتوں میں بے تحاشا اضافے کے باعث کاشتکاروں کی پیداواری لاگت میں مسلسل اضافہ ہو رہا ہے، جس سے زرعی پیداوار اور کسانوں کی معاشی حالت متاثر ہو رہی ہے۔آصف حیات خان نے کہا کہ کسان ملک کی غذائی ضروریات پوری کرنے کے لیے دن رات محنت کرتے ہیں، لیکن بڑھتے ہوئے اخراجات، مہنگے زرعی مداخل اور فصلوں کی مناسب قیمت نہ ملنے کے باعث کاشتکار شدید مشکلات کا شکار ہیں۔ چھوٹے کسانوں کے لیے فصلوں کی کاشت کے اخراجات پورے کرنا بھی مشکل ہوتا جا رہا ہے۔ انہوں نے زور دیا کہ کسانوں کو کھاد، معیاری بیج اور ڈیزل مناسب نرخوں پر فراہم کرنے کے لیے مؤثر اقدامات کیے جائیں، جبکہ زرعی اجناس کی مناسب قیمتوں کو یقینی بنا کر کاشتکاروں کو معاشی تحفظ فراہم کیا جائے۔گورنر پنجاب سردار سلیم حیدر خان نے کسانوں کو درپیش مسائل کی اہمیت پر زور دیتے ہوئے کہا کہ زرعی شعبے کی بہتری اور کاشتکاروں کی مشکلات کا ازالہ وقت کی اہم ضرورت ہے۔ کسانوں کو درپیش مسائل کے حل کے لیے متعلقہ امور پر توجہ دینا اور ایسے اقدامات کرنا ضروری ہے جن سے زرعی پیداوار میں اضافہ ہو، کاشتکاروں کو ریلیف ملے اور ملکی معیشت مستحکم ہو۔ملاقات میں زرعی شعبے کو درپیش چیلنجز، کسانوں کی معاشی مشکلات اور کاشتکاروں کو درکار سہولیات کے حوالے سے تبادلہ خیال کیا گیا۔ آصف حیات خان نے امید ظاہر کی کہ کسانوں کے مسائل کو متعلقہ فورمز پر اجاگر کرنے اور ان کے حل کے لیے مؤثر اقدامات کی راہ ہموار ہوگی۔