مڈٹرم انتخابات ‘ ٹرمپ کی مقبولیت کو دھچکا’ 64فیصد امریکی کارکردگی سے ناخوش

واشنگٹن (این این آئی)امریکا میں وسط مدتی انتخابات سے قبل صدر ڈونلڈ ٹرمپ کی کارکردگی پر عوامی عدم اطمینان بڑھنے کا انکشاف ہوا ہے۔امریکی نشریاتی ادارے کے سروے کے مطابق 64 فیصد امریکیوں نے صدر ٹرمپ کی مجموعی کارکردگی پر عدم اطمینان کا اظہار کیا، جبکہ 36 فیصد نے ان کی کارکردگی کو تسلی بخش قرار دیا۔سروے کے مطابق مہنگائی پر قابو پانے کے معاملے میں بھی صدر ٹرمپ کو عوامی حمایت حاصل نہیں ہوسکی۔ 55 فیصد امریکیوں نے مہنگائی کم کرنے سے متعلق ان کے دعوے کو مسترد کیا، جبکہ 77 فیصد افراد نے مہنگائی کے خلاف ان کی کارکردگی پر ناراضی ظاہر کی۔امریکی معیشت کی صورتحال بھی عوامی تشویش کا اہم سبب سامنے آئی۔ سروے میں 74 فیصد شرکا نے معاشی حالات پر شدید پریشانی ظاہر کی، جبکہ 53 فیصد نے خدشہ ظاہر کیا کہ مستقبل میں امریکی معیشت مزید خراب ہوسکتی ہے۔اس کے علاوہ 66 فیصد امریکیوں نے ملک کی مجموعی سمت پر عدم اطمینان کا اظہار کیا۔سروے میں سامنے آنے والی شرح صدر ٹرمپ کے دونوں ادوار میں ان کی مقبولیت کی کم ترین سطح ہے۔ یہ نتائج ایسے وقت میں سامنے آئے ہیں جب امریکا میں وسط مدتی انتخابات قریب آرہے ہیں اور معیشت و مہنگائی اہم عوامی موضوعات ہیں۔