وزیراعلیٰ سندھ کی شنگھائی کے میئر سے ملاقات، ہواوے کے تحقیق و ترقی مرکز کا دورہ

شنگھائی (این این آئی) وزیراعلیٰ سندھ سید مراد علی شاہ نے شنگھائی کے میئر ژو ژونگ منگ سے ملاقات میں کراچی اور شنگھائی کے درمیان باضابطہ طور پر سسٹر سٹی شراکت داری قائم کرنے کی تجویز پیش کی، جبکہ سندھ اور چین کے درمیان سرمایہ کاری، شہری منصوبہ بندی اور جدید ٹیکنالوجی کے شعبوں میں تعاون بڑھانے پر تبادلہ خیال کیا گیا۔ ملاقات میں سینئر وزیر شرجیل انعام میمن، وزیر آبپاشی و منصوبہ بندی و ترقی جام خان شورو، وزیر زراعت محمد بخش مہر، معاون خصوصی برائے سرمایہ کاری سید قاسم نوید، میئر کراچی مرتضیٰ وہاب اور دیگر حکام بھی شریک تھے۔ وزیراعلیٰ سندھ نے کہا کہ کراچی اور شنگھائی بڑے تجارتی اور بندرگاہی شہر ہیں اور باہمی تعاون سے دونوں شہروں کو فائدہ پہنچ سکتا ہے۔ سسٹر سٹی شراکت داری سے باقاعدہ روابط کو فروغ ملے گا۔ انہوں نے شہری منصوبہ بندی، عوامی ٹرانسپورٹ، ٹیکنالوجی اور بنیادی ڈھانچے کے شعبوں میں تعاون بڑھانے پر زور دیا۔