امریکی شہریوں سے آن لائن مالی فراڈ میں ملوث کال سنٹر پرچھاپہ

لاہور (کرائم رپورٹر) ایڈیشنل ڈائریکٹر این سی سی آئی اے لاہور زون عاطف امیر کی نگرانی میں
امریکی شہریوں سے آن لائن مالی فراڈ میں ملوث غیر قانونی کال سنٹر پر چھاپہ مار کر مالک ارشاد احمد بٹ اور اس کے ملازم اورنگزیب کو گرفتار کر لیا گیا۔ کارروائی کے دوران دو لیپ ٹاپ اور تین موبائل فون بھی برآمد کر لیے گئے۔ این سی سی آئی اے لاہور کو اوپن سورس انٹیلی جنس کے ذریعے مین بلیوارڈ پر واقع الحفیظ شاپنگ مال میں غیر قانونی کال سنٹر کی سرگرمیوں کا پتا چلا جس پر عدالت سے سرچ وارنٹ حاصل کرنے کے بعد کارروائی کی گئی۔ ابتدائی تحقیقات کے مطابق ملزمان امریکی شہریوں سے انشورنس کمپنیوں کے نمائندے بن کر رابطہ کرتے اور انشورنس مہم کے نام پر ان کے کریڈٹ اور ڈیبٹ کارڈز کی تفصیلات حاصل کرتے تھے۔ یہ معلومات غیر قانونی مالی لین دین کے لیے استعمال کی جاتی تھیں۔کارروائی کے دوران کال سنٹر کا مالک ارشاد احمد بٹ ولد غلام محمد بٹ اور اس کا ملازم اورنگزیب گرفتار ہوئے۔ برآمد ہونے والے لیپ ٹاپ اور موبائل فونز کی جانچ کے دوران آن لائن کالنگ سافٹ ویئر اور مالی فراڈ سے متعلق ڈیٹا بھی سامنے آیا ہے۔ این سی سی آئی اے نے تمام برآمد شدہ آلات قبضے میں لے کر مزید تحقیقات شروع کر دی ہیں۔ ایڈیشنل ڈائریکٹر عاطف امیر کے مطابق غیر قانونی کال سنٹرز اور بیرون ملک شہریوں کو مالی فراڈ کا نشانہ بنانے والے عناصر کے خلاف کارروائیاں جاری رہیں گی۔