پاکستان، جرمنی کا گرین سٹارٹ اپس اور پائیدار جدت کے فروغ کے لیے تعاون بڑھانے پر زور

اسلام آباد(این این آئی) برائے موسمیاتی تبدیلی ڈاکٹر مصدق ملک نے پاکستان اور جرمنی کے درمیان گرین اسٹارٹ اپس، پائیدار جدت اور تحقیق کے شعبوں میں تعاون کو مزید وسعت دینے پر زور دیتے ہوئے کہا ہے کہ موسمیاتی تبدیلیوں سے نمٹنے کے لیے مشترکہ اقدامات دونوں ممالک کے دیرینہ تعلقات کو نئی بلندیوں تک لے جا سکتے ہیں۔جرمن اتحاد کے دن کی مناسبت سے منعقدہ تقریب سے خطاب کرتے ہوئے وفاقی وزیر نے کہا کہ پاکستان جرمنی کے جدت اور تحقیق کے نظام سے استفادہ کرتے ہوئے ماحول دوست کاروبار کے فروغ اور ایسے پائیدار حل تیار کرنے کا خواہاں ہے جنہیں عالمی سطح پر بھی وسعت دی جا سکے۔انہوں نے کہا کہ حکومت ملک میں گرین اسٹارٹ اپس کے فروغ کے لیے ایک نئی کاروباری تحریک شروع کرنا چاہتی ہے، جس کے ذریعے نوجوان محققین اور جدت طراز افراد اپنے خیالات کو قابلِ عمل کاروبار میں تبدیل کر سکیں۔انہوںنے کہاکہ ہم اسٹارٹ اپس کا انقلاب لانا چاہتے ہیں، ہر چیز ماحول دوست اور پائیدار ہونی چاہیے۔ انہوں نے اس امر پر زور دیا کہ نوجوانوں کو محض مالی معاونت اور گرانٹس پر انحصار کرنے کے بجائے اپنے تحقیقی کام اور تخلیقی خیالات کی بنیاد پر کاروبار قائم کرنے کے مواقع فراہم کیے جائیں۔