لیوی ظالمانہ ٹیکسوں کیخلاف کل ضلعی ہیڈ کوارٹرز پر احتجاجی دھرنے ہونگیء جماعت اسلامی

لاہور (این این آئی)امیر جماعت اسلامی پاکستان حافظ نعیم الرحمن کی اپیل پر ظالمانہ ٹیکسوں، لیوی اور بھتہ ٹیکس کے خلاف ملک گیر احتجاجی تحریک کے سلسلے میں کل 23 اکتوبر بروز جمعہ پنجاب سمیت ملک بھر کے ڈسٹرکٹ ہیڈکوارٹرز پر احتجاجی دھرنے دیئے جائیں گے، پنجاب وسطی میں احتجاجی دھرنوں کو بھرپور اور موثر بنانے کے لیے امیر جماعت اسلامی پنجاب وسطی محمد جاوید قصوری نے تمام امرائے اضلاع اور ذمہ داران کو تیاریوں کی ہدایات جاری کر دی ہیں۔منصورہ میں ذمہ داران کے آن لائن اہم اجلاس سے خطاب کرتے ہوئے محمد جاوید قصوری نے کہا کہ جماعت اسلامی کی احتجاجی تحریک عوام کو ظالمانہ ٹیکسوں، ناجائز لیوی اور حکمرانوں کی عوام دشمن پالیسیوں سے نجات دلانے تک جاری رہے گی۔ حکمرانوں کو عوام پر مسلسل ٹیکسوں کا بوجھ ڈالنے کی روش ختم کرنا ہوگی۔ عوام پہلے ہی مہنگائی، بے روزگاری، بجلی اور پٹرول کی بلند قیمتوں سمیت سنگین معاشی مشکلات کا شکار ہیں، ایسے میں نت نئے ٹیکس عوام کے لیے ناقابل برداشت بوجھ بن چکے ہیں۔انہوں نے کہا کہ جماعت اسلامی کے کارکنان پرعزم ہیں اور عوام کے حقوق کے لیے ہر سطح پر آواز بلند کرتے رہیں گے۔ ملک کے کروڑوں عوام موجودہ سیاسی اور معاشی صورتحال سے شدید پریشان ہیں۔ حکمرانوں کو سمجھنا ہوگا کہ عوام کو مزید وعدوں کے بجائے عملی ریلیف درکار ہے۔ جماعت اسلامی عوام کے مسائل کے حل کے لیے اپنی جدوجہد جاری رکھے گی۔محمد جاوید قصوری نے سینیٹرز کو بلیو پاسپورٹ سفر کی سہولت دینے سے متعلق بل کی منظوری پر بھی شدید تشویش کا اظہار کرتے ہوئے اسے افسوس ناک اور شرمناک قرار دیا۔ انہوں نے کہا کہ عوام مہنگائی اور بے روزگاری کی چکی میں پس رہے ہیں، لیکن پارلیمان میں عوامی مسائل کے حل کے بجائے ارکانِ پارلیمان کی مراعات اور سہولیات میں اضافے کے لیے قانون سازی کی جا رہی ہے۔انہوں نے سوال اٹھایا کہ کیا سینیٹ کے ارکان کا بنیادی کردار اپنے ذاتی مفادات اور مراعات کا تحفظ ہے یا عوام کے مسائل کی ترجمانی؟ حکومت ہو یا اپوزیشن، اپنی تنخواہوں اور مراعات میں اضافے کے معاملے پر دونوں ایک ہی صف میں کھڑے دکھائی دیتے ہیں، جبکہ عام آدمی کے لیے ریلیف کے دروازے بند ہیں۔امیر جماعت اسلامی پنجاب وسطی نے کہا کہ 23اکتوبر کے احتجاجی دھرنے عوامی حقوق کی جدوجہد کا اہم مرحلہ ہوں گے۔ انہوں نے تمام ضلعی ذمہ داران کو ہدایت کی کہ دھرنوں کی بھرپور تیاری کی جائے اور عوام، تاجروں، نوجوانوں اور مختلف طبقات کو احتجاج میں شریک کیا جائے تاکہ حکمرانوں تک عوام کی حقیقی آواز موثر انداز میں پہنچائی جا سکے۔