بارکوڈ سکینرز میں سکیورٹی خامیاں، گوداموں کے نظام پر سائبر حملوں کا خدشہ

کراچی(این این آئی)عالمی سائبر سکیورٹی کمپنی کیسپرسکی نے بارکوڈ سکینرز کے ایک معروف ماڈل میں سکیورٹی خامیوں کا انکشاف کرتے ہوئے خبردار کیا ہے کہ ان خامیوں سے گوداموں اور ای کامرس کی ترسیلی زنجیر کے کمپیوٹر نیٹ ورکس کو سائبر حملوں کا خطرہ لاحق ہوسکتا ہے۔ کمپنی کے مطابق ان خامیوں سے حملہ آور غیر مجاز طور پر گوداموں کے نیٹ ورک تک رسائی حاصل کرکے سامان کی ترسیل اور کاروباری سرگرمیوں کو متاثر کرسکتے ہیں۔کیسپرسکی کے محققین نے گوداموں میں استعمال ہونے والے مختلف آلات کا جائزہ لینے کے دوران ایک بڑے ادارے کے تیار کردہ بارکوڈ اسکینر میں سیکیورٹی کی خامی دریافت کی۔ تحقیق کے مطابق عام طور پر وائرلیس بارکوڈ اسکینر ایک بیس اسٹیشن سے منسلک ہوتا ہے، جو آگے کمپیوٹر یا کاروباری نظام سے جڑا ہوتا ہے۔