قلعہ کہنہ قاسم باغ ملتان کا تاریخی کتب خانہ بحال ‘علم و تحقیق کے مرکز میں تبدیل

لاہور (خبر نگار) پنجاب والڈ سٹیز اینڈ ہیریٹیج ایریاز اتھارٹی (پی ڈبلیو سی اے) نے قلعہ کہنہ قاسم
باغ ملتان میں تاریخی کتب خانے کو بحال کرکے علم و تحقیق کے مرکز میں تبدیل کر دیا ۔جبکہ اہلِ علم، ادیبوں، محققین اور دانشوروں کے لیے تاریخی ماحول میں کیفے بھی قائم کر دیا گیا۔ ڈائریکٹر جنرل پی ڈبلیو سی اے نجم الثاقب اور کمشنر ملتان عامر کریم خان نے بحال کیے گئے تاریخی کتب خانے کا افتتاح کیا۔ تاریخی کتب خانے کی بحالی قلعہ کہنہ قاسم باغ منصوبے کا اہم حصہ ہے جس کا مقصد ملتان کے تاریخی و ثقافتی ورثے کا تحفظ اور اس کی اصل اہمیت کو اجاگر کرنا ہے۔ منصوبے کے تحت کتب خانے کو ایک ایسے علمی مرکز کی شکل دی گئی ہے جہاں اہلِ علم و دانش نہ صرف مطالعہ اور تحقیق کرسکیں گے بلکہ علمی، ادبی اور فکری موضوعات پر تبادلہ خیال بھی کرسکیں گے۔کتب خانے کے ساتھ قائم کیا گیا کیفے ادیبوں، محققین، دانشوروں اور علمی شخصیات کو ایک تاریخی ماحول میں اکٹھے ہونے اور ادبی و فکری سرگرمیوں کو فروغ دینے کے مواقع فراہم کرے گا۔ اس اقدام کو تاریخی ورثے کے تحفظ کے ساتھ ساتھ علمی و ادبی ماحول کی ترویج کی جانب اہم پیشرفت قرار دیا جارہا ہے۔ اس موقع پر ڈائریکٹر جنرل پی ڈبلیو سی اے نجم الثاقب نے کہا کہ حکومتِ پنجاب صوبے کے تاریخی اور ثقافتی ورثے کے تحفظ اور تاریخی مقامات کو آنے والی نسلوں کے لیے محفوظ بنانے کے لیے پرعزم ہے۔ قلعہ کہنہ قاسم باغ جیسے منصوبوں کے ذریعے نہ صرف تاریخ اور ثقافتی ورثے کو محفوظ بنایا جارہا ہے بلکہ تاریخی مقامات کو علم، ثقافت اور باہمی تبادلہ خیال کے فعال مراکز میں بھی تبدیل کیا جارہا ہے۔ حکومتِ پنجاب کی جانب سے تاریخی عمارات، یادگاروں اور ورثے کے مقامات کی بحالی کا مقصد ان قیمتی ثقافتی اثاثوں کو محفوظ کرکے نئی نسلوں تک منتقل کرنا ہے، تاکہ تاریخی مقامات کی اہمیت برقرار رہنے کے ساتھ وہاں علمی، ادبی اور ثقافتی سرگرمیوں کو بھی فروغ حاصل ہوسکے۔