ایئرپورٹ سکیورٹی فورس کیخلاف سینیٹرز پھٹ پڑے، مسافروں کو تنگ کرنیکا الزام

اسلام آباد (سٹاف رپورٹر) سینیٹ کی قائمہ کمیٹی برائے قواعد و ضوابط اور استحقاق کے اجلاس میں ایئرپورٹ سکیورٹی فورس (اے ایس ایف) کے خلاف سینیٹر ثمینہ ممتاز زہری کی تحریک استحقاق پر غور کیا گیا۔ اجلاس میں مسافروں کو ایئرپورٹس پر غیر ضروری طور پر تنگ کرنے اور چیکنگ کے دوران انہیں مشکوک بنانے کے حوالے سے تحفظات کا اظہار کیا گیا، جبکہ اے ایس ایف کا کوئی سرکاری افسر اجلاس میں شریک نہ ہونے پر بھی سوالات اٹھائے گئے۔اجلاس کے دوران کمیٹی کے چیئرمین نے بتایا کہ چیئرمین سینیٹ آفس کی جانب سے پیغام موصول ہوا ہے کہ اے ایس ایف کی طرف سے اس معاملے پر رپورٹ جمع کرا دی گئی ہے۔ تاہم سینیٹر ثمینہ ممتاز زہری نے اے ایس ایف کے جواب پر عدم اطمینان کا اظہار کیا۔سینیٹر سعدیہ عباسی نے کہا کہ ایئرپورٹس پر اے ایس ایف کا عملہ غیر ضروری طور پر مسافروں کو تنگ کرتا ہے۔ مسافروں کی اس انداز میں چیکنگ کی جاتی ہے کہ انہیں مشکوک بنا کر پیش کیا جاتا ہے، جس سے انہیں پریشانی اور مشکلات کا سامنا کرنا پڑتا ہے۔سینیٹر ثمینہ ممتاز زہری نے اجلاس میں نشاندہی کی کہ اے ایس ایف کا کوئی بھی سرکاری افسر آج اجلاس میں موجود نہیں ہے۔ انہوں نے مطالبہ کیا کہ آئندہ اجلاس میں اے ایس ایف کے متعلقہ حکام کو طلب کیا جائے تاکہ ان سے اس معاملے پر پوچھ گچھ کی جا سکے اور تحریک استحقاق کے حوالے سے وضاحت حاصل کی جا سکے۔سینیٹر جان محمد نے معاملے پر اظہارِ خیال کرتے ہوئے کہا کہ اگر ایک سینیٹر کے ساتھ ایسا ہو سکتا ہے تو عام آدمی کا تو اے ایس ایف والوں نے ستیا ناس کر دیا ہے۔ اجلاس میں اے ایس ایف کے رویے اور عام مسافروں کو پیش آنے والی مشکلات کے حوالے سے تحفظات سامنے آئے۔چیئرمین کمیٹی نے بھی تصدیق کی کہ اے ایس ایف کی جانب سے جمع کرائے گئے جواب سے سینیٹر ثمینہ ممتاز زہری مطمئن نہیں ہیں۔ اجلاس میں آئندہ نشست پر متعلقہ حکام کو بلا کر معاملے کی مزید جانچ پڑتال کرنے کی ضرورت پر زور دیا گیا۔