علیمہ خان ،عظمیٰ خان اور نورین نیازی کی مبینہ غیرقانونی حراست سے متعلق درخواستوں پر سماعت 28 اکتوبرتک ملتوی

لاہور (کورٹ رپورٹر) لاہور ہائیکورٹ نے بانی پی ٹی آئی عمران خان کی بہنوں علیمہ خان، عظمیٰ خان اور نورین نیازی کی مبینہ غیرقانونی حراست، رہائی اور جیل میں بنیادی سہولیات کی فراہمی سے متعلق درخواستوں پر سماعت 28 اکتوبر تک ملتوی کرتے ہوئے ہوم سیکرٹری اور جیل سپرنٹنڈنٹ کو طلب کرلیا۔ جسٹس عبہر گل خان نے علیمہ خان کے بیٹے شاہ ریز اور سکینہ بی بی کی درخواستوں پر سماعت کی۔ درخواست گزاروں کی جانب سے وکیل سلمان اکرم راجہ اور رانا مدثر عمر پیش ہوئے۔ وکلا نے موقف اختیار کیا کہ تینوں خواتین کو نظر بند ہوئے 35 روز گزر چکے ہیں اور نظر بندی کی مدت ختم ہونے کے باوجود انہیں حراست میں رکھا گیا ہے۔ وکلاء کے مطابق نورین نیازی اور عظمی خان کو ادویات، کپڑے اور دیگر بنیادی ضروریات فراہم کرنے کی درخواست بھی دی گئی، تاہم مطلوبہ سہولیات فراہم نہیں کی گئیں۔ درخواست گزاروں نے عدالت سے استدعا کی کہ نظر بندی کے احکامات کالعدم قرار دے کر تینوں خواتین کی فوری رہائی کا حکم دیا جائے، انہیں ادویات، کپڑے اور کتابیں فراہم کی جائیں اور ذمہ داران کے خلاف توہین عدالت کی کارروائی کی جائے۔