جنرل بس سٹینڈ پیرودھائی کے تمام تر اختیارات ریجنل ٹرانسپورٹ اتھارٹی کو منتقل

راولپنڈی(سٹی رپورٹر) ڈپٹی کمشنر راولپنڈی کیپٹن(ر)ندیم ناصر نے جنرل بس سٹینڈ پیرودھائی کے تمام تر اختیارات میونسپل کارپوریشن سے لے کر ریجنل ٹرانسپورٹ اتھارٹی (آر ٹی اے)کو منتقل کر دئیے کارپوریشن کی اربوں روپے
مالیت کی پراپرٹی آر ٹی اے کو منتقل کرنے پر میونسپل ملازمین میں تشویش کی لہر دوڑ گئی ذرائع کا کہنا ہے کہ قانون کے مطابق سی کلاس بس سٹینڈ کارپوریشن کے پاس ہوتی ہے، جبکہ بی کلاس بس سٹینڈ کا صرف انتظامی کنٹرول سیکریٹری ریجنل ٹرانسپورٹ اتھارٹی (آر ٹی اے) کو تفویض ہوتا ہے، لیکن اس کی پراپرٹی، اس کی ملکیت اور اس کی دکانوں کے کرایوں سمیت ہر طرح کی آمدن ہمیشہ میونسپل کارپوریشن کی ہی رہتی ہے۔ سی کلاس میں بھی اڈہ ایڈمنسٹریٹر کارپوریشن سے مقرر ہوتا ہے جبکہ یہی اصول جنرل بس سٹینڈ پیرودھائی پر بھی لاگو ہوتا ہے۔ یہ بس سٹینڈ میونسپل کارپوریشن راولپنڈی کی اپنی خرید کردہ ذاتی اراضی پر تعمیر ہوا ہے۔ یہ بلدیہ کی اپنی کمائی کا ذریعہ ہے۔ سیکریٹری آر ٹی اے کو اگر انتظامی نظم و نسق کا اختیار دیا بھی جائے تو اس کا یہ مطلب ہرگز نہیں کہ وہ اس کی پراپرٹی کا مالک بن جائے اور اس کی دکانوں کا کروڑوں روپے کا کرایہ میونسپل فنڈ کی بجائے کسی اور مد میں جائے۔ انتظامی کنٹرول اور مالکانہ حقوق میں نمایاں فرق ہے۔ آل پاکستان لوکل گورنمنٹ ورکرز فیڈریشن پنجاب کے چیئرمین غلام محمد ناز کے مطابق آر ٹی اے گزشتہ کئی برسوں سے انتظامی کنٹرول کی آڑ میں مکمل ملکیتی قبضہ چاہتے تھے۔ پہلے یہ کوششیں ناکام ہوئیں۔کیونکہ منتخب نمائندوں نے اس کی بھرپور مخالفت کی اور ایوان سے قانونی قرارداد منظور کی۔ اب جب ڈپٹی کمشنر راولپنڈی کے پاس ہی ایڈمنسٹریٹر میونسپل کارپوریشن راولپنڈی کا اضافی چارج بھی آ گیا تو اس دوہرے اختیارات کا فائدہ اٹھایا گیا۔ محتاط اندازے کے مطابق ایک انتظامی حکم کے ذریعے کارپوریشن کی 25 ارب روپے کے لگ بھگ کی پراپرٹی آر ٹی اے کو دے دی گئی ذرائع کے مطابق کارپوریشن ملازمین کے ممکنہ احتجاج کے پیشگی سدباب کے لئے کارپوریشن کی یونین کے منتخب صدر کو 3 ایم پی او کے تحت جیل بھجوادیا گیا کارپوریشن ملازمین کے مطابق پیرودھائی بس سٹینڈ کی بیش قیمت پراپرٹی کارپوریشن کی آمدن کا ایک بڑا ذریعہ تھی جو نہ صرف عوامی فلاح و بہبود اور تعمیر وترقی میں معاون تھی بلکہ کارپوریشن کے موجودہ و ریٹائرڈ ملازمین کی تنخواہوں اور پنشن کے حصول کا ذریعہ تھی انہوں نے وزیر اعلی پنجاب مریم نواز، سینئر صوبائی وزیر مریم اورنگزیب سے اپیل کی ہے کہ صورتحال کا فوری نوٹس لے کر کارپوریشن کی پراپرٹی واپس دلوائی جائے۔