پی آئی اے کے نئے یونیفارم کیلئے معروف فیشن ڈیزائنر حسن شہریار یاسین کا انتخاب

کراچی (بزنس رپورٹر) پاکستان انٹرنیشنل ایئر لائنز (پی آئی اے) نے اپنے نئے یونیفارم کی تیاری کے لیے معروف فیشن ڈیزائنر حسن شہریار یاسین (HSY) کا انتخاب کرلیا ہے۔ نئے یونیفارمز کی رونمائی پی آئی اے کے نئے بوئنگ 787 طیارے کی پہلی پرواز کے موقع پر کی جائے گی، جو 31 اکتوبر کو لندن سے اسلام آباد کے لیے روانہ ہوگی۔ترجمان پی آئی اے کے مطابق ایئرلائن نے گزشتہ ماہ کراچی میں ملک کے معروف فیشن ڈیزائنرز کو نئے یونیفارم ڈیزائن کرنے کی دعوت دی تھی۔ پیش کردہ ڈیزائنز میں جدت، اعلیٰ معیار اور پاکستان کے ثقافتی ورثے کی عکاسی کو مدنظر رکھتے ہوئے حسن شہریار یاسین کے ڈیزائن کا انتخاب کیا گیا۔ترجمان نے بتایا کہ 31 اکتوبر کو لندن سے اسلام آباد جانے والی بوئنگ 787 کی پہلی پرواز میں پی آئی اے کا عملہ نئے یونیفارمز میں ملبوس ہوکر مسافروں کا استقبال کرے گا۔پی آئی اے کی نئی انتظامیہ مسافروں کو اعلیٰ معیار کی سفری سہولیات فراہم کرنے کے لیے پْرعزم ہے۔ اس سلسلے میں جدید اور تفریحی سہولیات سے آراستہ طیاروں کی شمولیت، موجودہ بیڑے کے طیاروں میں نئی نشستوں اور کیبن کی تنصیب، عملے کی بہتری اور کھانوں کے نئے مینو سمیت متعدد اقدامات کیے جا رہے ہیں۔