شافع حسین ‘ فیصل ایوب کی زیرصدارت انرجی ڈیپارٹمنٹ میں اہم اجلاس

لاہور (ین این آئی)صوبائی وزیر صنعت و تجارت چوہدری شافع حسین نے انرجی ڈیپارٹمنٹ جیل روڈ کا دورہ کیا جہاں انہوں نے صوبائی وزیر توانائی فیصل ایوب کھوکھر کے ہمراہ اہم اجلاس کی صدارت کی۔ اجلاس میں پنجاب کے صنعتی مراکز میں انڈسٹری کو سستی،معیاری اور قابلِ اعتماد بجلی کی فراہمی کی تجاویز کا جائزہ لیا گیا۔اجلاس میں محکمہ صنعت و تجارت اور انرجی ڈیپارٹمنٹ کا انڈسٹریل اسٹیٹس میں صنعتوں کو سستی بجلی کی فراہمی کے لئے مل کر کام کرنے پر اتفاق ہوا۔محکمہ صنعت و تجارت، محکمہ توانائی اور پی ایف اے ایس کے نمائندوں پر مشتمل ٹیکنیکل کمیٹی تشکیل دینے کا فیصلہ بھی کیاگیا۔یہ کمیٹی صنعتی مراکز میں انڈسٹری کو سستی بجلی کی فراہمی کی تجاویز کا جائزہ لے کر جلد حتمی پلان پیش کرے گی۔ صوبائی وزیر صنعت و تجارت چوہدری شافع حسین نے اس موقع پر گفتگوکرتے ہوئے کہاکہ صنعتی مراکز میں صنعتوں کو سستی بجلی کی فراہمی سے انڈسٹری کا گروتھ ریٹ بڑھے گا۔انڈسٹری کو سستی اور قابل اعتماد توانائی کی فراہمی کیلئے انرجی ڈیپارٹمنٹ کے ساتھ مل کر کام کیا جائے گا۔