انڈونیشین سفارتی وفد کا یو ایم ٹی کا دورہ، تعلیمی و تحقیقی تعاون بڑھانے پر اتفاق

لاہور (پ ر) انڈونیشیا کے ڈپٹی ہیڈ آف مشن رحمت ہندیارٹا کسومہ کی قیادت میں اعلیٰ سطحی سفارتی وفد نے یونیورسٹی آف مینجمنٹ اینڈ ٹیکنالوجی (یو ایم ٹی) لاہور کا دورہ کیا، جہاں پاکستان اور انڈونیشیا کے درمیان تعلیمی شراکت داری، مشترکہ تحقیق اورطلبہ و اساتذہ کے علمی تبادلوں کو فروغ دینے پر تبادلہ خیال کیا گیا۔ یو ایم ٹی کے ڈائریکٹر ریسرچ اینڈ انوویشن پروفیسر عابد شیروانی نے وفد کا خیرمقدم کرتے ہوئے کہا کہ بین الاقوامی تعلیمی روابط اور تحقیقی تعاون نوجوانوں کے لیے نئے مواقع پیدا کرنے کے ساتھ دونوں ممالک کے دوستانہ تعلقات کو مزید مضبوط بناسکتے ہیں۔ انہوں نے عالمی سطح پر طلبہ کو تعلیمی و ثقافتی تجربات فراہم کرنے کے لیے یو ایم ٹی کے عزم کا اظہار کیا۔ انڈونیشیا کے ڈپٹی ہیڈ آف مشن رحمت ہندیارٹا کسومہ نے یو ایم ٹی کی تعلیمی کاوشوں کو سراہتے ہوئے کہا کہ انڈونیشیا اعلیٰ تعلیم اور جدید تحقیق کے فروغ کے لیے یو ایم ٹی کے ساتھ اشتراک کے امکانات پر کام کرے گا۔ انہوں نے کہا کہ دونوں ممالک کے تعلیمی اداروں میں شراکت داری سے طلبہ اور اساتذہ کے لیے تعاون اور علمی تبادلے کے نئے مواقع پیدا ہوں گے۔ ملاقات میں یو ایم ٹی کے پرووسٹ پروفیسر ڈاکٹر عامر اعظم خان، وائس پرووسٹ ڈاکٹر سامیہ اور ڈائریکٹر آٹ ریچ اینڈ انٹرنیشنلائزیشن معتقی ملک سمیت اساتذہ اور طلبہ نے شرکت کی۔ اس موقع پر انڈونیشین وفد اور طلبہ کے درمیان سوال و جواب کا خصوصی سیشن بھی منعقد ہوا، جس میں تعلیمی تعاون، ثقافتی روابط اور بین الاقوامی مواقع پر گفتگو کی گئی۔ تقریب کے اختتام پر یو ایم ٹی کے پروفیسر عابد شیروانی اور انڈونیشیا کے ڈپٹی ہیڈ آف مشن رحمت ہندیارٹا کسومہ کے درمیان تحائف اور سووینئرز کا تبادلہ ہوا۔