وزیر اعلیٰ گلگت بلتستان سے کینیڈا کے ہائی کمشنر طارق علی خان کی ملاقات

گلگت ( بیورو رپورٹ) وزیر اعلیٰ گلگت بلتستان امجد حسین سے پاکستان میں تعینات کینیڈا کے ہائی کمشنر طارق علی خان نے ملاقات کی۔ اس موقع پر وزیر اعلیٰ نے گفتگو کرتے ہوئے کہا کہ گلگت بلتستان کی تعمیر و ترقی کے حوالے سے کینیڈین حکومت کا تعاون قابلِ تحسین ہے۔ گلگت بلتستان جغرافیائی اعتبار سے منفرد اہمیت کا حامل خطہ ہے، جہاں سیاحت، معدنیات، توانائی اور زراعت کے شعبوں میں سرمایہ کاری کے وسیع مواقع موجود ہیں۔صوبائی حکومت کی ترجیح ہے کہ بین الاقوامی سیاحوں اور سرمایہ کاروں کو گلگت بلتستان میں سرمایہ کاری اور سیاحت کے لیے بھرپور سہولیات فراہم کی جائیں۔ اس مقصد کے لیے خصوصی اصلاحات متعارف کرائی گئی ہیں اور ون ونڈو آپریشن کے تحت سرمایہ کاروں کو سہولیات فراہم کی جا رہی ہیں۔ پبلک پرائیویٹ پارٹنرشپ کے تحت بین الاقوامی سرمایہ کاروں کے لیے سازگار ماحول بھی فراہم کیا جا رہا ہے۔کینیڈین سیاحوں کو گلگت بلتستان کے سیاحتی مواقع سے آگاہ کرنے کے لیے خصوصی ایکسپو کا انعقاد کیا جائے گا، جس کے لیے کینیڈین حکومت کا تعاون درکار ہوگا۔ صوبائی حکومت سرمائی سیاحت کے فروغ کے لیے بھی اقدامات کر رہی ہے۔موسمیاتی تبدیلیوں کے باعث گلگت بلتستان کے گلیشیرز کو سنگین خطرات لاحق ہیں۔ ان کے تحفظ کے لیے گلیشیر پروٹیکشن اتھارٹی قائم کی گئی ہے۔ گلیشیرز کی موثر نگرانی اور تحفظ کے لیے کینیڈین حکومت کی جدید تحقیق اور ٹیکنالوجی کی بنیاد پر تکنیکی معاونت فراہم کرنے کی ضرورت ہے۔ بین الاقوامی سیاحتی مقامات تک رسائی کو ممکن بنانے اور ان کے تحفظ کے لیے متعلقہ محکمے کام کر رہے ہیں۔اس موقع پر کینیڈا کے ہائی کمشنر طارق علی خان نے گفتگو کرتے ہوئے کہا کہ کینیڈین حکومت گلگت بلتستان کے عوام کی فلاح و بہبود، صحت اور دیگر اہم شعبوں میں تعاون کر رہی ہے۔ کینیڈین سرمایہ کاروں اور سیاحوں کو گلگت بلتستان میں سرمایہ کاری اور سیاحت کے مواقع سے روشناس کرانے کے لیے ہر ممکن تعاون فراہم کیا جائے گا۔گلگت بلتستان سیاحت اور قدرتی وسائل کے اعتبار سے انتہائی اہمیت کا حامل اور منفرد خطہ ہے۔ یہاں کے عوام اپنی مہمان نوازی کے باعث دنیا بھر میں ایک منفرد مقام رکھتے ہیں۔ انہوں نے اعلیٰ تعلیم سمیت مختلف شعبوں میں دوطرفہ تعاون کو مزید فروغ دینے کے عزم کا بھی اظہار کیا۔