گوجرانوالہ ، ساہیوال کے دو حلقوں میں ضمنی انتخابات کیلئے پولنگ آج ہو گی

لاہور( این این آئی)پنجاب کے اضلاع گوجرانوالہ اور ساہیوال میں قومی اسمبلی اور پنجاب اسمبلی کے ایک ، ایک حلقے میں ضمنی انتخابات کیلئے پولنگ آج (اتوار) کے روز ہو گی جس کے لئے سکیورٹی سمیت تمام انتظامات کو حتمی شکل دیدی گئی ، این اے 97گوجرانوالہ 1اور پی پی 2023ساہیوال6میں ہونے والے ضمنی انتخاب کے لئے سکیورٹی کے پیش نظر پاک فوج اور رینجرز کے دستوں کو 9 نومبر تک اسٹینڈ بائی پر رکھا گیا ہے ،سکیورٹی پلان کے تحت پنجاب رینجرز دوسرے درجے کی جبکہ پاک فوج تیسرے درجے کی رسپانس فورس کے طور پر دستیاب ہوگی۔ گوجرانوالہ کے حلقہ این اے 77 کی نشست مسلم لیگ (ن)کے پانچ مرتبہ منتخب ہونے والے رکن قومی اسمبلی چوہدری محمود بشیر ورک کے 11 ستمبر کو انتقال کے باعث خالی ہوئی تھی، اس حلقے میں ان کے صاحبزادے راشد بشیر ورک سمیت 11امیدوار انتخابی میدان میں ہیں۔ ساہیوال کے حلقہ پی پی 203 کی نشست مسلم لیگ (ن)کے رکن پنجاب اسمبلی چوہدری محمد حنیف جٹ کے 17 ستمبر کو انتقال کے باعث خالی ہوئی تھی۔ اس حلقے میں مسلم لیگ (ن)کے امیدوار محمد اسد حنیف جٹ مرحوم رکن اسمبلی کے بھتیجے ہیں جبکہ تحریک احساس پاکستان کے محمد اویس محمود سمیت دیگر امیدوار بھی انتخابی عمل میں حصہ لے رہے ہیں۔ ساہیوال کے اس حلقے میں مجموعی طور پر سات امیدوار میدان میں ہیں۔ پاکستان تحریک انصاف نے ضمنی انتخابات کے بائیکاٹ کا اعلان کر رکھا ہے، جبکہ پیپلز پارٹی، جمعیت علمائے اسلام(ف)، جماعت اسلامی اور تحریک لبیک نے بھی پی پی 203 میں امیدوار نامزد نہیں کیے۔