اٹک شہر کے مختلف ہوٹلوں میں مبینہ منافع خور مافیا کا راج

اٹک ( بیورو رپو رٹ) اٹک شہر کے مختلف ہوٹلوں میں مبینہ منافع خور مافیا کا راج، غیر معیاری کھانے اور چائے مہنگے داموں فروخت، شہری پریشان، اٹک شہر کے مختلف ہوٹلوں میں مبینہ طور پر منافع خور مافیا سرگرم ہو گیا، غیر معیاری کھانوں اور چائے کی مہنگے داموں فروخت کا سلسلہ جاری ہے، جس کے باعث شہری دونوں ہاتھوں سے لٹنے پر مجبور ہیں، ہوٹلوں میں کھانے پینے کی اشیاء کے معیار اور صفائی ستھرائی کے انتظامات پر بھی سوالات اٹھنے لگے ہیں، شہریوں کا کہنا ہے کہ ناقص اور غیر معیاری کھانے کھانے سے لوگ مختلف بیماریوں میں مبتلا ہو رہے ہیں، جبکہ چائے اور دیگر اشیائے خورونوش کی قیمتیں بھی من مانے انداز میں وصول کی جا رہی ہیں، عوامی و سماجی حلقوں نے اس صورتحال پر شدید تشویش کا اظہار کرتے ہوئے ضلعی انتظامیہ، اسسٹنٹ کمشنر اٹک، محکمہ فوڈ اتھارٹی اور متعلقہ اداروں کے اعلیٰ حکام سے مطالبہ کیا ہے کہ شہر بھر کے ہوٹلوں، ریسٹورنٹس اور کھانے پینے کے مراکز کا فوری نوٹس لیا جائے، ہوٹلوں میں استعمال ہونے والے اشیائے خورونوش کے معیار، صفائی کے انتظامات اور سرکاری نرخ ناموں پر عمل درآمد کو یقینی بنانے کے لیے باقاعدہ چیکنگ کی جائے، خلاف ورزی کرنے والے ہوٹل مالکان کے خلاف جرمانوں اور قانونی کارروائی سمیت سخت اقدامات کیے جائیں تاکہ شہریوں کو معیاری اور صحت بخش کھانے مناسب قیمتوں پر میسر آ سکیں۔ عوامی حلقوں نے مطالبہ کیا ہے کہ اس مسئلے کو معمولی نہ سمجھا جائے بلکہ عوامی صحت اور شہریوں کے حقوق کے تحفظ کے لیے فوری عملی اقدامات کیے جائیں۔