ایشیائی ترقیاتی بینک نے پاکستان کیلئے 50کروڑ ڈالر قرض کی منظوری دے دی

اسلام آباد(نیوز ایجنسیاں ) ایشیائی ترقیاتی بینک نے پاکستان کیلئے 50کروڑ ڈالر قرض کی منظوری دے دی۔اے ڈی بی کے اعلامیہ کے مطابق پاکستان میں قدرتی آفات سے سالانہ 2ارب ڈالر نقصان ہوتا ہے، اس قرض سے پاکستان کی قدرتی آفات سے نمٹنے کی صلاحیت بہترہوگی، قرض قدرتی آفات کے بعد فوری بجٹ معاونت فراہم کرنے کے لئے ہوگا۔اے ڈی بی کا کہنا ہے کہ پاکستان میں سیلاب، زلزلے اور دیگر آفات سے معاشی نقصانات ہوتے ہیں، 2022کے سیلاب سے پاکستان کو 14.9ارب ڈالر براہ راست نقصان ہوا، 2022کے سیلاب سے 15.2ارب ڈالر کے معاشی نقصانات ہوئے جب کہ91لاکھ افراد غربت کا شکار ہوئے۔اعلامیہ کے مطابق قدرتی آفات سے غریب اور دیہی آبادی سب سے زیادہ متاثر ہوتی ہے، خواتین اور لڑکیاں قدرتی آفات سے غیر متناسب طور پر متاثر ہوتی ہیں، اس پروگرام سے آفات سے بچائو اور خطرات کے انتظام میں بہتری آئیگی، پاکستان کی ترقیاتی منصوبہ بندی میں قدرتی آفات سے تحفظ شامل ہوگا، آفات کے بعد مالی وسائل کی دستیابی بہتر بنائی جائیگی اور پاکستان کا ڈیزاسٹر رسک فنانسنگ نظام مضبوط بنایا جائیگا۔اے ڈی بی کے مطابق آفات سے پہلے تیاری انسانی جانیں اور معاشی وسائل محفوظ بناسکتی ہے، تیاری سے مستقبل کے معاشی نقصانات کم کیے جاسکتے ہیں، پاکستان میں قدرتی آفات سے متاثرہ کمزور طبقات کا تحفظ یقینی بنایا جائے گا، پاکستان کی آفات سے نمٹنے کی استعداد بڑھانے کے لئے معاونت جاری رہے گی۔
قرض