ناقص کارکردگی، 13 پرائس کنٹرول مجسٹریٹس ڈی نوٹیفائی’ اسامیا ں خالی

لاہور (این این آئی)لاہور میں گراں فروشی پر قابو پانے میں ناکامی پر ضلعی انتظامیہ نے 13پرائس کنٹرول مجسٹریٹس کو ڈی نوٹیفائی کر دیا۔ مجسٹریٹس کے خلاف کارروائی ناقص کارکردگی اور فرائض کی ادائیگی میں غفلت کے باعث کی گئی۔تفصیلات کے مطابق اکتوبر کے دوران 4پرائس کنٹرول مجسٹریٹس نے ایک بھی انسپکشن نہیں کی، جبکہ ایک مجسٹریٹ کی کارکردگی صرف 14انسپکشنز تک محدود رہی۔ کارروائی کے 20روز گزرنے کے باوجود خالی آسامیوں پر نئے مجسٹریٹس تعینات نہیں کیے جا سکے۔مجسٹریٹس کی عدم تعیناتی کے باعث لاہور کے متعدد علاقوں میں پرائس کنٹرول کا نظام متاثر ہونے لگا ہے، جس کا فائدہ اٹھاتے ہوئے گراں فروش من مانے نرخ وصول کر رہے ہیں۔ شہری مہنگائی کے باعث اشیائے ضروریہ مہنگے داموں خریدنے پر مجبور ہیں۔ترجمان ضلعی انتظامیہ کے مطابق پرائس کنٹرول کے حوالے سے نیا نظام نافذ کیا جا رہا ہے، جس کے تحت تھانوں کے بجائے تحصیل کی سطح پر پرائس کنٹرول مانیٹرنگ کی جائے گی۔