لاہور کی فضائی آلودگی میں نمایاں کمی عالمی رینکنگ میں 15 ویں نمبر پر آ گیا

لاہور،پشاور(نیوز ایجنسیاں) لاہور کی فضائی آلودگی میں نمایاں کمی واقع ہوگئی، ایئر کوالٹی انڈیکس
115 ریکارڈ کیا گیا، جس کے باعث شہر عالمی رینکنگ میں 15 ویں نمبر پر آ گیا۔ جمعہ کو اے کیوآئی بہتر صورتحال کی عکاسی کر رہا ہے، ہوا کی رفتار اور سمت کے ساتھ مقامی آلودگی پر کنٹرول بھی بہتری کا اہم سبب ہے۔پنجاب کی سینئر وزیر مریم اورنگزیب کا کہنا ہے کہ 2024 میں آلودگی کے ذرائع پر موثر کنٹرول کا مربوط نظام موجود نہیں تھا، آلودگی کی روک تھام، مسلسل نگرانی اور سخت کارروائی حکومت کی ترجیح ہے۔صنعتی یونٹس، بھٹوں، گاڑیوں اور کوڑے کے دھوئیں پر قابو نہ ہوتا تو بہتری ممکن نہ تھی، سازگار موسم کے ساتھ مقامی آلودگی پر موثر کنٹرول کے بغیر پائیدار بہتری ممکن نہیں۔انہوں نے کہا کہ وزیراعلی کی قیادت میں اسموگ کیخلاف مستقل اور سائنسی بنیادوں پر نظام قائم کیا گیا ہے، آج کا بہتر اے کیو آئی صرف موسمی حالات کا نتیجہ قرار نہیں دیا جا سکتا۔مریم اورنگزیب نے کہا کہ مقامی آلودگی کے ذرائع کیخلاف مسلسل کارروائیوں نے بھی بہتری میں اہم کردار ادا کیا ہے۔دوسری جا نب ملک کے مختلف شہروں میں بارش سے سردی کی شدت میں اضافہ ہوا ہے ۔محکمہ موسمیات کے مطابق لاہور میں موسم ابر آلود رہنے کا امکان ہے جبکہ دن کے مختلف اوقات میں کہیں کہیں بوندا باندی ہو سکتی ہے۔اعدادوشمار کے مطابق شہر کا زیادہ سے زیادہ درجہ حرارت 29 جبکہ کم سے کم 17 ڈگری سینٹی گریڈ رہنے کا امکان ہے، ہوا میں نمی کا تناسب 70 فیصد ریکارڈ کیا گیا ہے جبکہ ہوا پانچ کلومیٹر فی گھنٹہ کی رفتار سے چل رہی ہے۔دوسری جانب خیبرپختونخوا اور گلگت بلتستان میں موسم سرما کی پہلی بارش اور برفباری سے موسم انتہائی سرد ہوگیا، بابوسر ٹاپ پر شدید برفباری کے باعث بیسر سے آگے راستے بند ہوگئے، خراب موسم کے باعث دو آئل ٹینکر پھنس گئے، اپر ہنزہ کے پہاڑوں اور خنجراب پاس پر بھی برفباری ہوئی ہے۔محکمہ موسمیات کا کہنا ہے کہ آئندہ 24 گھنٹوں کے دوران مزید بارش اور برفباری کا امکان ہے۔ ادھر ضلع سوات کی تحصیل مٹہ کے مضافاتی علاقہ ڈوغلگوں بہا میں لینڈ سلائیڈنگ کا افسوسناک واقعہ پیش آیا ہے۔ پہاڑی سے مٹی اور پتھر گرنے سے ایک گھر کو شدید نقصان پہنچا ہے،تاہم واقعے میں کوئی جانی نقصان نہیں ہوااور اہل خانہ محفوظ رہے۔ علاقہ مکینوں نے حکومت اور ضلعی انتظامیہ سے مطالبہ کیا ہے کہ متاثرہ غریب خاندان کی فوری مالی مدد کی جائے اورانہیں محفوظ جگہ پر منتقل کیا جائے۔
فضائی آلودگی