اسلام آباد (نیوز ایجنسیاں )اسلام آباد ہائیکورٹ نے 190ملین پائونڈ کیس میں بانی پی ٹی آئی عمران خان اور بشریٰ بی بی کی سزا کے خلاف اپیلیں مقرر کردیں۔اسلام آباد ہائیکورٹ کے چیف جسٹس سرفراز ڈوگر اور جسٹس محمد آصف 18نومبر کو اپیلوں پر سماعت کریں گے۔ اسلام آباد ہائیکورٹ نے سزا کے خلاف اپیلوں پر وکلاء سے دلائل طلب کررکھے ہیں۔ چیف جسٹس اسلام آباد ہائیکورٹ سرفراز ڈوگر اور جسٹس محمد آصف نے 190ملین پائونڈ کیس میں بانی پی ٹی آئی اور بشری بی بی کی اپیلوں پر گزشتہ سماعت کا 2 صفحات کا تحریری حکم نامہ جاری کردیا جس میں عدالت نے 190ملین پائونڈ اپیلوں کی پیپر بکس 7روز میں تیار کرنے کی ہدایت کی ہے۔اسلام آباد ہائیکورٹ نے اپنے فیصلے میں کہا کہ توقع کرتے ہیں سلمان صفدر اور لطیف کھوسہ ملاقات کے بعد سیاسی معاملات پربات نہیں کریں گے، دونوں وکلا خود کو صرف قانونی معاملات تک ہی محدود رکھیں گے۔ عدالتی فیصلے میں کہا گیا ہے کہ ایڈووکیٹ جنرل ملاقات کرائیں گے جس کا دورانیہ ایک گھنٹے سے کم نہیں ہوگا، لطیف کھوسہ نے کہا ملاقات نہ ہونے کی وجہ سے دلائل نہیں دے سکتے۔سلمان صفدر نے کہا مجھے اپیل پر دلائل کیلئے ہدایات مل چکیں لیکن ملاقات کا دورانیہ کم تھا، وکلا کی استدعا پر دلائل تیاری کے لیے ایک ہفتے کا وقت دیا جاتا ہے۔
190 ملین پاؤنڈ کیس
