انشورنس کمپنی کی آئینی درخواست منظور کرکے معاملہ دوبارہ صارف عدالت کو بھجوا دیاگیا

لاہور (کورٹ رپورٹر) لاہور ہائیکورٹ کے جسٹس جواد حسن نے انشورنس کمپنی کی آئینی
درخواست منظور کرتے ہوئے صارف عدالت بھکر کا فیصلہ کالعدم قرار دیتے ہوئے معاملہ دوبارہ قانون کے مطابق حل کرنے کیلئے صارف عدالت کو بھجوا دیا، عدالت نے قرار دیا ہے کہ خصوصی قانون کے تحت قائم فورم کے دائرہ اختیار کو عمومی قانون کے ذریعے ختم نہیں کیا جا سکتا، انشورنس پالیسی سے متعلق تنازعات کی سماعت کا اختیار انشورنس ٹربیونل کو حاصل ہے،عدالت نے صارف عدالت کو ایک ماہ میں وجوہات پر مبنی تحریری فیصلہ کرنے کی ہدایت کی ہے،عدالت نے قرار دیا کہ صارف عدالت کا اختیار قانون میں متعین حدود تک محدود ہے، ہر نوعیت کے تجارتی یا سروس تنازعات اس کے دائرہ اختیار میں نہیں آتے، محض انشورنس سروسز کی فراہمی سے متعلق تنازع ہونے پر صارف عدالت کو سماعت کا اختیار حاصل نہیں ہو جاتا، فیصلے کے مطابق انشورنس پالیسی ہولڈر اور انشورنس کمپنی کے درمیان پالیسی سے متعلق تنازعات انشورنس ٹربیونل کے دائرہ اختیار میں آتے ہیں۔ عدالت نے قرار دیا کہ صارف عدالت کسی شکایت پر کارروائی سے قبل اپنے دائرہ اختیار کا تعین کرنے کی پابند ہے، صارف عدالت بھکر نے انشورنس کمپنی کی جانب سے دائر اعتراض مسترد کرکے شکایت کو قابلِ سماعت قرار دیا تھا۔