لاہور(ویب ڈیسک) رواں ماہ بھارت میں شیڈول ورلڈ کپ ہاکی ٹورنامنٹ میں 20 سالہ ابوبکر محمود قومی ٹیم کے کم عمر ترین کھلاڑی بن گئے۔28 نومبر تا 16 دسمبر بھارت کے شہر بھوبنیشورمیں کھلے جانے والے ورلڈ کپ ہاکی ٹورنامنٹ میں شرکت کرنے والی پاکستان ہاکی ٹیم سینئر اور جونیئر کھلاڑیوں کے بہترین انتخاب کے ساتھ میدان میں اترے گی۔ایف آئی ایچ شماریات کے مطابق قومی ہاکی ٹیم کے دستے میں عمر کے لحاظ سے 31 سالہ کھلاڑی راشد محمود ٹیم کے عمررسیدہ ترین کھلاڑی ہیں جبکہ گول کیپر عمران بٹ 30 سال، محمد زبیر 30 سال، فیصل قادر 30 سال،عرفان جونیئر 29سال اور کپتان رضوان سینئر28 سال عمر کے ساتھ ورلڈ کپ میں شرکت کریں گے۔ 20 سالہ ابوبکرمحمود ورلڈ کپ میں شرکت کرنے والے قومی ہاکی اسکواڈ کے کم سن ترین کھلاڑی ہوں گے۔پاکستان ہاکی ٹیم میں شامل کھلاڑیوں میں محمد عمر بھٹہ 163 کیپ ریکارڈ کے حامل ہیں جبکہ کپتان رضوان سینئر154 کیپ ریکارڈ کے ساتھ دوسرے، عمران بٹ 138 کیپ ریکارڈ کے ساتھ تیسرے، راشد محمود 134 کیپ ریکارڈ کے ساتھ چوتھے اور علی شان 131 کیپ ریکارڈ کے ساتھ پانچویں نمبرپرہیں۔ واضح رہے کہ یہ شماریات پاکستان ہاکی فیڈریشن کی جانب سے دیئے گئے شماریات سے متصادم اور مختلف ہیں۔ پی ایچ ایف کی جانب سے دیئے گئے شماریات میں مذکورہ کھلاڑی 250 سے زائد کیپ ریکارڈ کے حامل ہیں۔ورلڈ کپ میں پاکستان ہاکی ٹیم اپنا پہلا میچ جرمنی کے خلاف یکم دسمبر کوکھیلے گی، جبکہ دوسرا میچ 5 دسمبر کو ملائشیا اور تیسرا آور آخری پول میچ نودسمبر کو ہالینڈ ہاکی ٹیم کے خلاف نبرد آزماء ہوگی. قومی ہاکی ٹیم کی تیاریاں اس وقت زوروشور سے جاری ہیں اور قومی ہاکی ٹیم اس بابت بہتر کارکردگی دکھانے کے لئے بہت پرامید ہے۔

لاہور(ویب ڈیسک)پاکستان سپر لیگ کی فرنچائز ٹیم پشاور زلمی کے کپتان ڈیرن سیمی کے بعد کرس جورڈن نے بھی مداحوں کو پشتو زبان میں پیغام دے کر خوش کردیا۔کرس جورڈن نے پشاور زلمی کے فینز کو مخاطب کرتے ہوئے کہا کہ امید ہے آپ سب خیر و عافیت سے ہوں گے، پشاور زلمی پی ایس ایل فور کے لیے پوری طرح تیار ہے اور فینز کی سپورٹ سے پی ایس ایل فور میں اچھی کارکردگی دکھائیں گے۔انہوں نے خود کو ’کرس جورڈن اورکزئی‘ کا نام دیتے ہوئے کہا کہ پشاور زلمی فیملی کا حصہ بننے پر خوشی ہے، ممکن ہوا تو پشاور میں ملیں گے۔کرس جارڈن پشاور زلمی کی سپلیمنٹری کٹیگری میں شامل ہیں۔ پشاور زلمی نے ڈیرن سیمی کو پی ایس ایل فور کے لیے کپتان برقرار رکھا ہے ، سیمی کی قیادت میں سیزن ٹوکی فاتح اور تیسرے سیزن میں رنر اپ رہی ہے۔

لاہور(ویب ڈیسک) ہاکی ورلڈ کپ کے لئے پاکستان ہاکی ٹیم کے آفیشل گانے ” اٹھا ہاکی چل میدان میں تم “ کی وڈیو جاری کردی گئی۔ورلڈ کپ میں شرکت کرنے والی پاکستان ہاکی ٹیم کی حوصلہ افزائی کے لیے آفیشل گانے کی وڈیو جاری کر دی گئی ہے۔ سحر علی بگا کی آواز میں ریکارڈ کیے جانے والے ” اٹھا ہاکی چل میدان میں تم “ گانے کی ریکارڈنگ میں قومی ہاکی ٹیم کے کھلاڑیوں کو میگا ایونٹ کی تیاریاں کرتے ہوئے دکھایا گیا ہے۔دو منٹ اور انیس سیکنڈ پر مشتمل اس وڈیو میں کوچز توقیر ڈار، ریحان بٹ اور دانش کلیم کھلاڑیوں میں جیت کا جوش پیدا کرتے ہوئے دکھائی دے رہے ہیں، اس وڈیو میں پاکستان ہاکی ٹیم کی 1994ءکی ٹرافی اور ماضی کے سنہری دور کی فوٹیج بھی دکھائی گئی ہے۔پاکستان ٹیم کے کوچ دانش کلیم اور ریحان بٹ کا کہنا تھا کہ ولڈ کپ کے موقع پر قومی ٹیم میں حوصلہ افزائی خوش آئند ہے جس سے کھلاڑیوں کے حصولے بلند ہو رہے ہیں۔ ان کا کہنا تھا کہ ہماری ٹیم کی تمام تیاریاں مکمل ہیں کوشش ہوگی کہ ہر میچ میں شاندار کارکردگی کا مظاہرہ کرتے ہوئے حریف ٹیموں کو ٹف ٹائم دیں جب کہ کوچز کا مزید کہنا تھا کہ کھلاڑیوں پر واضح کر دیا ہے کہ ورلڈ کپ کے میچوں کے دوران وہ دباﺅلینے کی بجائے اپنی نیچرل گیم پیش کریں۔یاد رہے کہ ورلڈ کپ 28 نومبر سے بھارتی شہر بھوبنیشور میں شروع ہوگا جس میں مجموعی طور پر سولہ ٹیمیں شریک ہوں گی جہاں پاکستانی ٹیم میگا ایونٹ کا پہلا میچ یکم دسمبر کو جرمنی کےخلاف کھیلے گی۔

کراچی (ویب ڈیسک)ویسٹ انڈیز کے اسٹار کرکٹر ڈیوائن براوو نے پی ایس ایل کے چوتھے ایڈیشن کے لیے پاکستان آنے کا اعلان کیا ہے۔ڈی جے براوو نے اپنے ویڈیو پیغام میں کہا کہ پاکستان سپر لیگ میں کوئٹہ گلیڈی ایٹرز کاحصہ بننے پر خوش ہوں اور گلیڈی ایٹرز کی ٹیم پاکستان سپر لیگ کی چیمپئن بنےگی۔انہوں نے کہا کہ پی ایس ایل کے لیے منتخب کرنے پر کوئٹہ گلیڈی ایٹرز کا شکر گزار ہوں اور 2006 کے بعد پہلی بار پاکستان آو¿ں گا۔ٹی ٹوئنٹی کرکٹ میں 450 وکٹیں لینے والے ویسٹ انڈین کرکٹ اسٹار نے کوئٹہ گلیڈی ایٹرئز کے چاہنے والوں کے لیے اپنا مشہور گانا ’چیمپئن‘ بھی گایا۔خیال رہے کہ 2016 میں ہونے والے ٹی ٹوئنٹی ورلڈ کپ کے فائنل میں براوو نے تین وکٹیں حاصل کر کے ویسٹ انڈیز کو دوسری بار ورلڈ چیمپئن بنوانے میں اہم کردار ادا کیا تھا۔ویسٹ انڈین کرکٹر رواں برس اکتوبر میں ہر قسم کی انٹرنیشنل کرکٹ سے ریٹائرمنٹ کا اعلان کر چکے ہیں تاہم وہ مختلف ممالک میں کھیلی جانے والی لیگز باقاعدگی سے کھیلتے ہیں۔

کراچی(ویب ڈیسک) وزیراعلیٰ سندھ مراد علی شاہ کے مشیر مرتضیٰ وہاب نے اس بات کی تصدیق کی ہے کہ صوبائی حکومت کی جانب سے ہاکی فیڈریشن کو 10 کروڑ روپے کی گرانٹ دی گئی ہے۔ مرتضیٰ وہاب کا کہنا تھا کہ قومی کھیل ہاکی کے لیے سندھ حکومت کا تعاون جاری رہے گا اور ورلڈ کپ میں شرکت سے قبل ہاکی فیڈریشن کی بروقت مالی اعانت کرکے ہم نے اپنا قومی فریضہ ادا کیا ہے۔اس سوال کے جواب میں کہ سندھ حکومت کی گرانٹ فیڈریشن کس طرح خرچ کرے گی اور کیا صوبائی حکومت تفصیلات طلب کرے گی؟ مرتضیٰ وہاب کا کہنا تھا کہ ‘ایسا نہیں ہو سکتا، یہ فیڈریشن کی صوابدید ہے کہ وہ کس انداز میں اس رقم کو خرچ کرے’۔واضح رہے کہ پاکستان ہاکی فیڈریشن نے ورلڈ کپ سے قبل حکومت سے آٹھ کروڑ روپے مانگے تھے، جو تاحال نہیں مل سکے، البتہ اطلاعات کے مطابق ہائیر (HAIER) کمپنی نے فیڈریشن کو اسپانسر شپ کی مد میں 90 لاکھ روپے کی ادائیگی کی ہے۔دوسری جانب معروف بزنس مین ملک ریاض کی صاحبزادی نے چند روز قبل لاہور میں قومی ہاکی ٹیم کے تربیتی کیمپ کے دوران 25کھلاڑیوں کو ایک، ایک لاکھ روپے نقد ادا کیے تھے، جب کہ کوچ دانش کلیم اور ریحان بٹ کو بھی ایک، ایک لاکھ روپے دیئے تھے۔حکومت سندھ کی طرف سے ہاکی فیڈریشن کو دیئے جانے والے دس کروڑ روپے کی ادائیگی سے قریباً پونے 2 کروڑ روپے کھلاڑیوں اور ٹیم مینجمنٹ میں ڈیلی الاو¿نس کی مد میں تقسیم کیے جائیں گے۔حکومت سندھ نے ایک ایسے مرحلے پر ہاکی فیڈریشن کو گرانٹ دی ہے، جب ورلڈ کپ سے قبل فیڈریشن مالی بحران کا شکار تھی اور کھلاڑیوں نے ڈیلی الاو¿نس کے بغیر ورلڈ کپ جیسے اہم ٹورنامنٹ میں نہ جانے کا عندیہ دیا تھا۔وزیراعلیٰ سندھ کے مشیر مرتضیٰ وہاب نے فیڈریشن کی مالی اعانت کی خبر کی بڑے پیمانے پر تشہیر نہ ہونے کے سوال پر جواب دیا کہ ‘اس سے کوئی فرق نہیں پڑتا، کیونکہ پاکستان پیپلز پارٹی کا منشور ہے کہ قومی اداروں اور عوامی خدمت کے راستوں پر چلنا ہے اور اگر اس کی تشہیر نہ بھی ہو، تو بھی ہمیں کوئی فرق نہیں پڑتا’۔