لاہور: (ویب ڈیسک) پاک فضائیہ کے ہیرو پائلٹ آفیسر راشد منہاس کا 51 واں یوم شہادت آج منایا جارہا ہے۔
پائلٹ آفیسر راشد منہاس شہید 17 فروری 1951 کو پیدا ہوئے، ملکی فضائی سرحدوں کی حفاظت کے جذبے سے سرشارراشد منہاس نے 14 مارچ 1971 کو پاک فضائیہ کے 51 ویں جی ڈی پی کورس میں کمیشن حاصل کیا۔
بعدازاں انہیں آپریشنل کنورژن کورس کیلیے ماڑی پور (مسرور) میں واقع نمبر 2 سکواڈرن میں تعینات کیا گیا جہاں رب کائنات نے ان کے مقدر میں لازوال رفعتیں لکھ رکھی تھیں۔
20 اگست 1971 کے دن راشد منہاس کی قربانی سے ایک ناقابل فراموش داستان رقم ہوئی، اس دن راشد منہاس نے اپنے انسٹرکٹر پائلٹ فلائیٹ لیفٹیننٹ مطیع الرحمان کے ناپاک عزائم کو خاک میں ملا دیا جس نے انکے T-33 تربیتی طیارے کو ہائی جیک کر کے بھارت لے جانے کی کوشش کی۔
راشد نے جہاز کا کنٹرول واپس لینے کی بھرپور جدوجہد کی اوراس سے قبل کہ جہاز ملکی سرحد عبور کر جاتا اسے زمین بوس کرنے کو ترجیح دی۔
مٹی کے اس بہادر سپوت نے اپنی جان مادر وطن پر قربان کر دی لیکن ملکی وقار پر آنچ تک نہیں آنے دی، راشد منہاس کی اس عظیم قربانی اور ناقابل فراموش شجاعت کے اعتراف میں حکومت پاکستان نے انہیں ملک کا سب سے بڑا فوجی اعزاز نشان حیدر عطا کیا۔
راشد منہاس شہید ہماری آنے والی نوجوان نسل کیلئے مشعل راہ ہیں اور انکو شجاعت و قربانی کی علامت کے طور پر ہمیشہ یاد رکھا جائے گا۔

اسلام آباد: (ویب ڈیسک) شہباز گل سے ملاقات کی اجازت نہ ملنے پر عمران خان نے آج ریلیاں نکالنے کا اعلان کر دیا۔
تفصیلات کے مطابق گزشتہ روز سابق وزیراعظم عمران خان پی ٹی آئی رہنما شہباز گل سے ملنے پمز ہسپتال پہنچے تھے جہاں پولیس نے ان کو ملنے کی اجازت نہ دی۔
پمز ہسپتال کے باہر میڈیا سے گفتگو کرتے ہوئے عمران خان نے کہا تھا کہ عدالتی حکم کے باوجود پولیس نے ہمارا راستہ روکا، ہمیں شہباز گل سے نہیں ملنے دیا گیا، آج ملک بھر میں ریلیاں نکالی جائیں گی۔
انہوں نے مزید کہا ہے کہ سب کو احتجاج میں شرکت کی دعوت دیتا ہوں، آج مغرب کے بعد زیرو پوائنٹ سے ایف نائن پارک تک احتجاجی ریلی کی قیادت میں خود کروں گا۔
دوسری جاب پی ٹی آئی کے احتجاج کے باعث انتظامیہ بھی الرٹ ہے، وفاقی دارالحکومت میں دفعہ 144 نافذ ہے۔
ڈپٹی کمشنر اسلام آباد نے کہا کہ 5 سے زائد افراد کے کسی بھی جگہ پر اکٹھا ہونے پر پابندی ہے، اسلام آباد انتظامیہ کی جانب سے یہ پابندی 23 جولائی 2022 سے عائد ہے، ہر قسم کے اجتماع، جلسے، جلوس اور ریلی وغیرہ پر پابندی عائد ہے۔
ڈی سی نے مزید کہا کہ کسی بھی جگہ پر جلسے جلوس، ریلی اور لوگوں کے اجتماع کی اجازت نہیں ہے، عوام الناس کو مطلع کیا جاتا ہے کہ کسی بھی جگہ پر 5 سے زائد افراد اکٹھے نہ ہوں، کسی بھی قسم کی خلاف ورزی کرنے والے کے خلاف قانون کے مطابق ایکشن لیا جائے گا۔

کراچی: (ویب ڈیسک) وفاقی وزیر خارجہ و چیئرمین پیپلزپارٹی بلاول بھٹو نے صوبے سندھ میں بارشوں سے متاثرہ افراد کیلئے ریلیف پیکیج دینے کی ہدایت کردی
وزیراعلیٰ ہاوس میں بلاول بھٹو کی صدارت میں سندھ میں طوفانی بارشیں ،بڑے پیمانے پر جانی و مالی نقصانات سے متعلق اجلاس ہوا،اجلاس میں وزیراعلی سندھ اور سندھ کابینہ ارکان شریک ہوئے۔
دوران اجلاس بریفنگ دیتے ہوئے بتایا گیا کہ سندھ میں بارشوں کےدوران مختلف واقعات میں متعددافراد جاں بحق ہوئے،ٹھٹھہ سجاول، دادو اورسانگھڑ بارشوں سے بری طرح متاثر ہیں،کراچی میں انفراسٹرکچر کو بارشوں سےشدید نقصان پہنچا ہے،بسندھ بھر میں 41 ہزار سےزائد کچے وپکےمکانات بھی تباہ ہوگئے ہیں۔
بلاول بھٹو نے تمام ایم پی ایز کو بارش متاثرہ علاقوں میں عوام کے ساتھ رہنے کی ہدایت کرتے ہوئے متاثرین کیلئے ریلیف پیکیج دینے کا بھی حکم دیا۔
وزیر اعلیٰ سندھ نے بلاول بھٹو کو بتایا کہ ایک اندازے کے مطابق 40 ارب روپے کا صوبے میں نقصان ہوا ہے۔
چیئرمین پیپلزپارٹی نے کہا عوام کو انکے نقصانات کا صوبائی حکومت ازالہ کرے ،ہم وفاقی حکومت سے بھی کہیں گے کہ صوبے کے عوام کے نقصانا ت کا ازالہ کریں۔

اسلام آباد: (ویب ڈیسک) رہنما پی ٹی آئی اسد عمر نے دعویٰ کیا ہے کہ کچھ دیر قبل ان کے گھر پر پولیس موبائل آئی تھی۔
ٹوئٹر پر جاری بیان میں اسد عمر نے کہا کہ کچھ دیر پہلے پولیس موبائل میرے گھر آئی، پولیس نے میرے ساتھ کام کرنے والوں سے پوچھا کہ اسد عمر یہاں رہتے ہیں؟
اسد عمر نے مزید کہا کہ دیکھتے ہیں کیا ارادہ ہے ان کا۔
اس معاملے پر اسلام آباد پولیس کا ردعمل بھی سامنے آیا ہے۔
اسلام آباد کیپیٹل پولیس کا کہنا ہے کہ اسد عمر کی طرف سے چھاپے کے متعلق ٹوئٹ کی مکمل تردید کرتے ہیں، اسلام آباد پولیس واقف ہے کہ کون سا رہنما کہاں رہتا ہے۔حکومتی ادارے کے خلاف غلط پروپیگنڈا افسوسناک اور چند لوگوں کی طرف سے جھوٹی مہم کا حصہ ہے۔

اسلام آباد: (ویب ڈیسک) وزارت قانون نے اسلام آباد میں 20 نئے لا افسران کی تعیناتی کی منظوری دے دی۔
صدر مملکت ڈاکٹر عارف علوی کی منظوری کے بعد وزارت قانون نے نئے لا افسران کی تعیناتی کا نوٹیفکیشن جاری کر دیا ہے۔
راشدین نواز، منور اقبال دگل، حسن نواز مخدوم، ملک جاوید اقبال کو ایڈیشنل اٹارنی جنرل تعینات کیا گیا جبکہ محمد شفقت خان، فضل الرحمان خان، سید احسن رضا کاظمی اور میاں محمد فیصل عرفان بطور ڈپٹی اٹارنی جنرل خدمات انجام دیں گے۔
12 وکلا کو اسسٹنٹ اٹارنی جنرل مقرر کیا گیا ہے جن میں عثمان رسول گھمن، محمد اقبال، محمد نسیم، محمد بشیر، محمد عثمان نواز، مس عذرا بتول کاظمی، احمد رشید، شوکت نواز اعوان، سر بلند خان، خالد محمود، محمد جواد ارسلان اور یاسر عرفات شامل ہیں۔ نوٹی فکیشن میں کہا گیا ہے۔