All posts by Khabrain News

اہم خبریں, بزنس

ملک میں بجلی کا شارٹ فال 7 ہزارمیگاواٹ تک پہنچ گیا

اسلام آباد: (ویب ڈیسک) وزارت توانائی کے ذرائع کا کہنا ہے کہ ملک میں بجلی کی مجموعی پیداوار 15 ہزار اور طلب 21 ہزار 500 میگاواٹ تک پہنچ گئی ہے۔ ملک میں بجلی کا شارٹ فال 7 ہزارمیگاواٹ تک پہنچ گیا ہے۔ ذرائع وزارت توانائی کا کہنا ہے کہ بجلی کی مجموعی پیداوار 15 ہزار500 اور طلب 21 ہزار500 میگاواٹ ہے۔ اور اس وقت ملک بھر میں 10 گھنٹے تک بجلی کی لوڈشیڈنگ کی جارہی ہے۔
وزارت توانائی کے ذرائع کا کہنا ہے کہ ہائیڈل پاور پلانٹس 1 ہزار میگا واٹ بجلی پیدا کر رہے ہیں، سرکاری تھرمل پاور پلانٹس 2 ہزار 500 میگاواٹ بجلی پیدا کر رہے ہیں، نجی شعبے کے بجلی گھروں کی پیداوار 12 ہزار میگا واٹ ہے، بجلی کی مجموعی پیداواری صلاحیت 33 ہزارمیگاواٹ ہے، کم پیداوار سے سسٹم کو یومیہ 10 ارب روپے سے زائد کا نقصان ہورہا ہے، اور بعض پاور پلانٹس بند ہونے کے باوجود کپیسٹی پیمنٹ وصول کررہے ہیں۔
دوسری جانب بجلی کی لوڈشیڈنگ کے حوالے تیار کی گئی رپورٹ میں انکشاف کیا گیا ہے کہ گزشتہ حکومت کی نااہلی کے باعث نندی پور پاور پلانٹ 13 دسمبر 2021 سے بند ہے، جب کہ نندی پور پاورپلانٹ کی پیداواری صلاحیت 525 میگاواٹ ہے، جام شور پاور پلانٹ 9 اپریل 2022 سے بند ہے، مظفر گڑھ 840 میگاواٹ کا بجلی گھر جو 8 اپریل 2022 سے بند ہے، پورٹ قاسم 621 میگاواٹ بناتا ہے اور 31 مارچ 2022 سے بند ہے، ‏447 میگاواٹ کا گدو پاور پلانٹ 12 فروری 2021 سے بند ہے، ‏245 میگاواٹ مظفرگڑھ پاور پلانٹ یکم جولائی 2021 سے بند ہے۔
دستاویز کے مطابق تھرکول پاور پلانٹ 602 میگاواٹ 11 مارچ 2022 سے بند ہے، ‏621 میگاواٹ ساہیوال کول 20 مارچ 2022 سے بند ہے، بجلی گھر ایندھن نہ ہونے کے باعث بند کیے گئے، نندی پور پاورپلانٹ کو 13 دسمبر 2021 سے ایل این جی فراہمی نہیں ہورہی، جب کہ بعض پاورپلانٹس تیکنیکی وجوہات کی بنیاد پربند کیے گئے۔

اہم خبریں, سائنس و ٹیکنالوجی

چاول کے چھلکے سے دنیا کی پہلی ایل ای ڈی تیار

ہیروشیما: (ویب ڈیسک) ایک دلچسپ کاوش میں جاپانی ماہرین نے پہلی مرتبہ چاول کی بھوسی سے روشنی خارج کرنے والی ایل ای ڈی بنائی ہے جو کم خرچ اور ماحول دوست اختراع ہے۔
پوری دنیا میں چاول کی صفائی کے دوران ہر سال دس کروڑ ٹن چاول کا چھلکا یا بھوسی پیدا ہوتی ہے۔ اب ہیروشیما یونیورسٹی کے سائنسدانوں نے اس فالتو چھلکے کو بازیافت (ری سائیکل) کرکے دنیا کا پہلا سلیکون کوانٹم ڈوٹ (کیو ڈی) بنایا ہے اور اسی پر مشتمل ایل ای ڈی تیار کی ہے۔ اس طرح زرعی کچرے کو ارزاں اور جدید ترین روشن ڈائیوڈ میں بدلا جاسکتا ہے۔
اس کی تحقیق امریکی کیمیکل سوسائٹی کے جرنل اے سی ایس سسٹین ایبل کیمسٹری اینڈ انجینیئرنگ میں شائع ہوئی ہے۔
’روایتی کوانٹم ڈوٹس میں عموماً کیڈمیئم، سیسہ اور دیگر زہریلی دھات استعمال ہوتی ہے۔ لیکن چاول کے چھلکے کی نئی ٹیکنالوجی سے یہ کام کم زہریلا اور ماحول دوست شکل اختیار کرجاتا ہے۔
مسام دار سلیکون (ایس آئی) 1950 کے عشرے میں سامنے آئے اور ان کے لیتھیئم آئن بیٹری، روشن مادوں اور طبی سینسر کی راہ ہموار ہوئی۔ یہ قدرت کے کارخانے میں موجود ہیں اور خردبینی (کوانٹم جسامت) کی بنا پر انہیں سیمی کنڈکٹر کے طور پر استعمال کیا جاسکتا ہے۔
ماحولیات خدشات کے لحاظ کی وجہ سے سائنسداں ایک عرصے سے ماحول دوست کوانٹم ڈوٹس کی تلاش میں تھے۔ اب جاپانی ماہرین کے مطابق چاول کا چھلکا انتہائی خالص سلیکا (SiO2) اور سفوف فراہم کرسکتا ہے جن کا معیار بہت بلند ہوتا ہے۔
ماہرین نے اس چھلکے کو پہلے ملنگ یعنی پیسنے اور بارک کرنے کے عمل سے گزارا گیا اور اس میں بعض نامیاتی اجزا کو جلاکر الگ کیا گیا بچی ہوئی شے کو برقی بھٹی میں گرم کیا گیا اور یوں سلیکا پاؤڈر سامنے آیا۔ تیسرے مرحلے میں پیچیدہ کیمیائی عمل سے اسے مزید خالص کرکے تین نینومیٹر کے ذرات میں تبدیل کیا گیا۔ اب مستحکم اور کیمیائی طور پر بہترین ذرات سامنے آئے جو سلیکن کوانٹم ڈوٹس میں ڈھل گئے۔ اس موقع پر وہ نارنجی مائل سرخ رنگت خارج کرنے لگے جس کی افادیت (ایفی شنسی) 20 فیصد تک تھی۔
اس طرح دنیا کی پہلی چاول چھلکا ایل ای ڈی تیار ہوگئی جس میں کسی قسم کے مضر اجزا شامل نہ تھے۔ یہ ایک شاندار طریقہ ہے جس سے ماحول دوست ایل ای ڈی کی تشکیل ممکن ہوئی جو سیلکون کوانٹم ڈوٹس پر مشتمل تھی۔
اگلے مرحلے میں ایل ای ڈی پر کچھ مادوں کو پرتیں لگائی گئیں جن میں انڈیئم ٹن آکسائیڈ (آئی ٹی او) گلاس سبسٹریٹ نے ایل ای ڈی کے اینوڈ کا کردار ادیا گیا اور بجلی کا اچھا موصل ثابت ہوا۔ اس طرح شفاف روشنی والی ایل ای ڈی تیار کی گئی ہیں۔ جہاں تک کیتھوڈ کا سوال ہے اس میں المونیئم کی پرت لگائی گئی ہے۔
سلیکون کوانٹم ڈوٹس پرمبنی یہ ایل ای ڈی مستقبل کے لیے ایک امید بن سکتی ہیں اور ترقی پذیر ممالک بھی اسے مقامی طور پر تیار کرسکتے ہیں۔ تاہم یہی ٹیم بہتر معیار کی ایل ای ڈی بنانے میں کوشاں ہے۔

اہم خبریں, دلچسپ و عجیب

یہ ہے دنیا کا طویل القامت خاندان، گنیز بک آف ورلڈ ریکارڈ کی تصدیق

منی سوٹا: (ویب ڈیسک) امریکہ میں ایک ایسا خاندان ہے جس کے سب سے کم عمر کی فرد کا قد بھی سب سے اونچا ہے اور یوں اسے گنیزبک آف ورلڈ ریکارڈ نے دنیا کے سب سے کوتاہ قامت خاندان کی سند عطا کی ہے۔
اگر اس خاندان کے تمام افراد کا مجموعی قد ایک ساتھ جمع کیا جائے تو ٹینس کورٹ کا نصف بنتا ہے۔ منی سوٹا کے علاقے ایسکو سے تعلق رکھنے والے اس خاندان کے ہر فرد کا اوسط قد چھ فٹ آٹھ انچ کے برابر (203 سینٹی میٹر) ہے۔ خاندان کے سب سے کم عمر فرد ایڈم ٹریپ کی عمر صرف 22 برس ہے اور ان کا قدر اپنے تمام اہلِ خانہ سے زائد ہے جو سات فٹ تین انچ کے برابر ہے۔
اسی طرح 27 سالہ سوانا ٹریپ کا قد چھ فٹ آٹھ انچ ہے ان کی بہن مولی کا 24 سال میں قد چھ فٹ چھ انچ تک پہنچ چکا ہے۔ دلچسپ بات یہ ہے کہ سارے بچوں کو ان کے قد کی بنا پر والی بال اور باسکٹ بال ٹیموں کا حصہ بنایا گیا ہے۔ اس خاندان کے جوان ہوتے ہوئے بچوں کی عمر کا راز خود ان کے والدین ہیں جن میں سے والد یعنی اسکاٹ کا قد6 فٹ 8 انچ ہے اور والدہ کرسی کا قد سب سے کم ہونے کے باوجود اب بھی 6 فٹ 3 انچ ہے۔
دسمبر 2020 میں ہی اس خاندان کی طویل القامت ریکارڈ کی خبریں عام ہوچکی تھیں تاہم گنیز بک آف ورلڈ ریکارڈ نے اب تصدیقی سند عطا کی ہے۔ بعض افراد کو زمین پر لیٹا کر بھی ان کا قد ناپا گیا ہے۔ اس طرح خاندان کو طویل القامت خاندان کا لقب دیا گیا ہے۔ تاہم پورا خاندان اس اعزاز پر بہت خوش ہے۔
پورے محلے میں اس خاندان کی دھوم ہیں جنہیں ریکارڈ یافتہ خاندان کے نام سے یاد کیا جاتا ہے اور یہی ان کی پہچان بن چکا ہے۔ خاندان کے سربراہ اسکاٹ کہتے ہیں کہ جب وہ پہلی جماعت میں تھے تو ان کا قد ان کی استانی سےبھی بلند تھا یہی وجہ ہے کہ قد کا بڑھاوا تھم نہ سکا اور وہ چھ فٹ سے بھی تجاوز کرچکے ہیں۔ تاہم انہیں طنز بھی برداشت کرنا پڑا۔ بالخصوص خاندان کی لڑکیوں کو بعض جملے برداشت کرنا پڑتے ہیں۔
ماہرین کے مطابق پورے خاندان کے غیرمعمولی قد کی وجہ جینیاتی ہے۔

اہم خبریں, صحت

خون کا عطیہ دینے سے بدن میں زہریلے مرکبات کم ہوتے ہیں

پرتھ: (ویب ڈیسک) پہلی مرتبہ ایک تحقیق سے معلوم ہوا ہے کہ باقاعدہ خون عطیہ کرنے سے بدن میں وہ زیریلے مرکبات کم ہوسکتے ہیں جنہیں پی ایف اے ایس کہا جاتا ہے۔
آسٹریلیا میں کی گئی طبی آزمائش سے یہ بات سامنے آئی ہے کہ خون اور پلازمہ عطیہ کرنے سے پی ایف اے ایس نامی زہریلے مرکبات میں 30 فیصد تک کمی واقع ہوسکتی ہے۔ ان کا پورا نام پرفلورواکلائل اور پولی فلوروالکائل سبسٹینسِس (پی ایف اے ایس)کہا جاتا ہے۔ یہ کیمیکل صنعتوں میں استعمال ہوتے ہیں اور انسانی بدن میں جاتے ہیں جنہیں ’ہمیشہ کے کیمیائی‘ اجزا بھی کہا جاتا ہے۔
پی ایف اے ایس کی لگ بھگ چار ہزار اقسام ہیں جو قالین سے لے کر برتنوں میں استعمال ہوتی ہے لیکن ان کی سب سے زیادہ مقدار آگ بجھانے والے فوم میں ہوتی ہے۔
یہی وجہ ہےکہ فائر فائٹر کے خون میں پی ایف اے ایس کی زائد مقدار ہوتی ہے۔ یہ کیمیکل بدن میں جاکر امنیاتی نظام کو متاثر کرتی ہے اور تھائی رائیڈ کو نقصان پہنچاتی ہیں۔ یہی وجہ ہے کہ اب پی ایف اے ایس سمیت (زہریلا پن) ہمارے لیے ایک چیلنج بن چکا ہے۔ دوسری جانب یہ بدن میں جاکر طویل عرصے تک موجود رہتے ہیں۔
نئی تحقیق میں آسٹریلیا کے 285 فائر فائٹر شامل کئے گئے جن کےخون میں ایک قسم کے پی ایف اے ایس یعنی پرفلورواوکٹین کی زائد مقدار موجود تھی۔ انہیں تین گروہوں میں بانٹا گیا۔ ایک سے کہا گیا کہ وہ ہر چھ ماہ بعد پلازمہ عطیہ کریں، دوسرے گروپ سے کہا کہ وہ ایک برس تک ہر 12 ہفتے بعد خون کا عطیہ دیں جبکہ ایک گروہ سے ایسا کچھ نہیں کہا گیا۔
اب جن افراد نے خون اور پلازمہ عطیہ کیا تھا ان کے خون میں پی ایف اے ایس کی سطح 30 فیصد تک کم دیکھی گئی اور یوں معلوم ہوا کہ خون اور پلازمہ عطیہ کرنے سے یہ خطرناک زہریلے کیمیکل بھی کم ہوسکتے ہیں۔ البتہ جن فائر فائٹرز نے خون یا پلازمہ میں سے کچھ عطیہ نہیں کیا ان کے خون میں کوئی فرق نہیں ہوا۔
یوں ثابت ہوا کہ خون اور پلازمہ عطیہ کرنا بہت مفید ہے۔ اس کی وجہ یہ ہے کہ آج کی تیزرفتار اور مصنوعی زندگی میں کوئی بھی ان کیمیائی اجزا سے محفوظ نہیں۔ ہمارے خون میں بھی ان کی کچھ نہ کچھ مقدار موجود ہوسکتی ہے اور یوں خون عطیہ کرنے سے اس سے چھٹکارا حاصل کیا جاسکتا ہے۔

اہم خبریں, پاکستان

سپریم کورٹ میں مونال ریسٹورنٹ کی بحالی کا حکم امتناع واپس لینے کی استدعا مسترد

اسلام آباد: (ویب ڈیسک) سپریم کورٹ نے اسلام آباد میں واقع مونال ریسٹورنٹ کی بحالی کا حکم امتناع واپس لینے کی استدعا مسترد کر دی۔
مونال ریسٹورنٹ سیل کرنے کے خلاف اپیل پر سماعت کے دوران جسٹس اعجاز الحسن نے ریمارکس دیے کہ حکم امتناع کی واپسی چاہتے ہیں تو باضابطہ درخواست دائر کریں۔
وکیل وائلڈ لائف بورڈ نے کہا کہ حکم امتناع کے حکم پر نظرثانی دائر کرنی پڑے گی، جسٹس اعجاز الاحسن نے کہا کہ جو آپ کو مناسب لگتا ہے وہ کریں۔
وکیل وائلڈ لائف بورڈ نے عدالت کو بتایا کہ مونال کا سارا سیوریج اسلام آباد میں پھیل رہا ہے، جس پر وکیل مونال مخدوم علی خان نے کہا کہ عدالت میں غلط بیانی سے کام لیا جا رہا ہے، وکیل وائلڈ لائف بورڈ نے کہا کہ مونال انتظامیہ بتا دے سیوریج کہاں جاتا ہے۔
جسٹس اعجاز الاحسن نے استفسار کیا کہ کیا ہائیکورٹ کا تفصیلی فیصلہ آ چکا ہے؟ مخدوم علی خان نے کہاکہ تفصیلی فیصلہ نہیں آیا، انٹرا کورٹ اپیل بھی اسی وجہ سے زیر التواء ہے۔
عدالت نے سماعت غیر معینہ مدت تک ملتوی کر دی۔

اہم خبریں, پاکستان

بلوچستان میں بلدیاتی انتخابات کیلئے کاغذات نامزدگی جمع کرانے کاسلسلہ شروع

کوئٹہ: (ویب ڈیسک) بلوچستان کے 132 اضلاع میں بلدیاتی انتخابات کے لئے کاغذات نامزدگی جمع کرانے کا سلسلہ آج سے شروع ہوگیا۔
الیکشن کمیشن کے مطابق بلوچستان میں بلدیاتی انتخابات کے لئے کاغذات نامزدگی 18اپریل تک متعلقہ ریٹرننگ افسروں کے پاس جمع کرائے جاسکیں گے۔
نامزد امیدواروں کی فہرستیں 19 اپریل کوجاری کی جائیں گی۔کوئٹہ اورلسبیلہ کے علاوہ بلوچستان کے تمام اضلاع میں پولنگ 29 مئی کو ہوگی۔

انٹر نیشنل, اہم خبریں

یوکرین کا حملہ،روس کا میزائلوں سے لیس بحری جنگی جہاز ڈوب گیا

ماسکو: (ویب ڈیسک) یوکرین کے میزائل حملے میں تباہ ہونے والا روس کا بحری جنگی جہاز بحیرہ اسود میں ڈوب گیا۔
غیرملکی خبرایجنسی کے مطابق یوکرین نے گزشتہ روزمیزائل حملے میں روس کے بحری جنگی جہاز کونشانہ بنایا تھا جس سے جہاز کوشدید نقصان پہنچا تھا۔حملے کے بعد جہاز میں دھماکے ہوئے تھے اورآگ لگ گئی تھی۔
روس کی وزارت دفاع کے حکام نے بحری جنگی جہاز موسکوا کے غرق ہونے کی تصدیق کردی۔ حکام کا کہنا تھا کہ جہازکو کھینچ کرواپس روسی بندرگاہ لایا جارہا تھا لیکن وہ راستے میں ڈوب گیا۔
روسی بحری جنگی جہاز کا وزن ساڑھے بارہ ہزارٹن تھا اوراس پرجدید ترین اینٹی شپ اورزمین سے فضا میں مارکرنے والے میزائل نصب تھے۔
یوکرین نے روسی جہاز کی غرقابی کوبڑی کامیابی قراردیا ہے۔

اہم خبریں, کھیل

جو روٹ نے انگلش ٹیم کی کپتانی سے دست برداری کا اعلان کر دیا

انگلینڈ: (ویب ڈیسک) انگلش ٹیسٹ کپتان جو روٹ نے کپتانی سے دستبرداری کا اعلان کر دیا ہے، ویسٹ انڈیز کے خلاف انگلینڈ کو ٹیسٹ سیریز میں شکست کا سامنا کرنا پڑا تھا ۔
جو روٹ نے 64 ٹیسٹ میچز میں انگلینڈ کی کپتانی کی جس میں 27 مرتبہ انگلش ٹیم فاتح رہی، بطور کپتان انہوں نے چودہ سنچریوں کی مدد سے پانچ ہزار دو سو پچانوے رنز سکور کیے ۔
جوروٹ کا کہنا ہے کہ انگلش ٹیم کی کپتانی اعزاز کی بات تھی، مشکل فیصلہ لینے کا یہ درست وقت ہے۔ گزشتہ دو سیریز میں انگلینڈ کو آسٹریلیا اور ویسٹ انڈیز کے ہاتھوں شکست کا سامنا کرنا پڑا تھا ۔

اہم خبریں, بزنس

نیپرا نے بجلی 4 روپے 85 پیسے فی یونٹ مہنگی کرنے کی منظوری دیدی

لاہور: (ویب ڈیسک) غربت کےہاتھوں ستائے عوام کیلئے بری خبر سامنے آ گئی، نیپرا نے 4 روپے 85 پیسے فی یونٹ بجلی کی قیمت میں اضافے کی منظوری دیدی ہے۔
حکومتی منتقلی کے بعد بجلی صارفین کو پہلا جھٹکا، نیپرا نے 4 روپے 85 پیسے فی یونٹ بجلی قیمت میں اضافے کی منظوری دیدی۔ بتایاگیاہے کہ اضافہ اپریل کے لیے فیول ایڈجسٹمنٹ کی مد میں کیا گیا ہے۔ ، سی پی پی اے -جی نے 4 روپے 94 پیسے فی یونٹ اضافے کی درخواست کی تھی۔
نوٹیفکیشن اتھارٹی نے 31 مارچ 2022 کو ایف سی اے پر عوامی سماعت کی تھی،نیپرا اس سے قبل جنوری کا ایف سی اے صارفین سے 5 روپے 94 پیسے چارج کیا گیا تھا جو کہ صرف 1 مہینے کے لئے تھا ۔ فروری کا ایف سی اے جنوری کی نسبت 1 روپے 9 پیسے اپریل میں کم چارج کیا جائے گا، اس کا اطلاق صرف اپریل کے ماہ کے بلوں پر ہوگا۔ نوٹیفکیشن کے مطابق اضافے کا اطلاق ڈسکوز کے تمام صارفین ماسوائے لائف لائن صارفین پر ہوگا، جبکہ کے الیکٹرک صارفین پر اس کا اطلاق نہیں ہوگا۔

اہم خبریں, پاکستان

سینیٹر فیصل جاوید کا کہنا ہے کہ کل رات کراچی کا پی ٹی آئی جلسہ سندھ کی تاریخ کا سب سے بڑا جلسہ ہوگا۔

اسلام آباد : سینیٹر فیصل جاوید کا کہنا ہے کہ کل رات کراچی کا پی ٹی آئی جلسہ سندھ کی تاریخ کا سب سے بڑا جلسہ ہوگا۔

تفصیلات کے مطابق سینیٹر فیصل جاوید نے سماجی رابطے کی ویب سائٹ ٹوئٹر پر اپنے پیغام میں کہا کہ کل رات کراچی کاجلسہ سندھ کی تاریخ کاسب سےبڑاجلسہ ہوگا، ہمیں اپنے ہی 25 دسمبر2011 کے جلسے کا ریکارڈ توڑنا ہے۔

فیصل جاوید کا کہنا تھا کہ پاکستان کی غیور قوم نے فیصلہ کرلیا امپورٹڈحکومت نامنظور، پوری قوم کی آواز ،فوری انتخابات۔

خیال رہے کراچی میں پاکستان تحریک انصاف کے پاور شو کی تیاریاں روز شور سے جاری ہے، چیئرمین عمران خان کل شام چار بجے کراچی پہنچیں گے۔

عمران خان اپنے دورے کے دوران شوکت خانم اسپتال کے لیے فنڈریزنگ افطار ڈنرمیں شرکت کریں گے اور رات کو باغ جناح گراؤنڈ میں جلسے سے خطاب کریں گے۔ .

چیئرمین پی ٹی آئی سولہ اپریل کی رات کراچی میں ہی قیام کریں گے۔