اسلام آباد: (ویب ڈیسک) وزیر مملکت برائے اطلاعات فرخ حبیب کا کہنا ہے کہ اپوزیشن لوگ اکھٹے نہیں کر سکتی اس لیے آر ہو یا پار یہ بری طرح خوار ہوں گے۔
اپنے ایک ٹوئٹرپیغام میں فرخ حبیب کا کہنا تھا کہ تحریک انصاف کے جلسے کو اپوزیشن خوفزدہ ہوکر رکوانا چاہ رہی تھی کیونکہ ان کو پتہ ہے کہ 27 مارچ کو دس لاکھ لوگ پریڈ گراؤنڈ اسلام آباد میں آجائیں گے۔
انہوں نے کہا کہ اپوزیشن نے بھی لانگ مارچ کی کال دی ہے جس کیلئے ان سے لوگ جمع نہیں ہورہے،آر یا پار والے بری طرح خوار ہوجائیں گے۔
پریگ: (ویب ڈیسک) چیک کے سابق صدر ویکلاو کلوس نے کہا ہے کہ وہ روس متنفر عناصر کے دباؤ میں آکر روس کی جانب سے دیا گیا ایوارڈ واپس نہیں کریں گے۔
عالمی میڈیا کے مطابق ویکلاو کلوس نے کہا کہ میں روسی ایوارڈ واپس نہیں کروں گا۔ بھلے یہ (روس مخالف) لوگ مجھے تختہ دار پر ہی کیوں نہ لے جائیں۔
چیک کے سابق صدر نے یہ بات مقامی اخبار کو دیے گئے ایک انٹرویو میں ایسے وقت کہی جب چیک کے ایک مشہور گلوکار جیرومر نوہاویکا نے بھی تنقیدوں کے باوجود روسی ایوارڈ واپس کرنے سے انکار کردیا۔
کلوس کو یہ ایوارڈ روسی سفیر ایلیکسی فیڈوتوو نے 2007 میں پریگ کیسل میں اقوام کو ایک دوسرے کے قریب لانے اور ثقافتی ورثے کو تحفظ دینے پر پیش کیا تھا۔
ویکلاو کلوس نے کہا کہ میں دباؤ میں آکر اپنے آپ کو اس حد تک نہیں گرا سکتا کہ روس کو ایوارڈ واپس کردوں۔ میں اس تعصب کی شدید مذمت کرتا ہوں جو آج بھی روس کیخلاف پایا جاتا ہے۔
ماسکو: (ویب ڈیسک) روس نے انسٹاگرام اور فیس بک کو ’شدت پسند‘ قرار دیتے ہوئے پابندی عائد کردی۔
فرانسیسی خبر رساں ایجنسی (اے ایف پی) کے مطابق ماسکو کی ایک عدالت نے میٹا کی ملکیتی سماجی رابطوں کی ویب سائٹس فیس بک اور انسٹا گرام کو ’شدت پسند ادارے‘ قرار دیتے ہوئے پابندی عائد کی۔
روسی حکام نے یوکرین سے جنگ کے معاملے پر امریکی ٹیکنالوجی کمپنی ’میٹا‘ پر روس مخالف مہم چلانے کا الزام عائد کرتے ہوئے اس کے تمام سوشل میڈیا پلیٹ فارمز پر پابندی عائد کرنے کا مطالبہ کیا تھا۔
عدالت کا اپنے فیصلےمیں کہنا تھا کہ وہ استغاثہ کے اس مطالبے سے متفق ہے کہ فیس بک اور انسٹاگرام پر ملک میں پابندی عائد کردی جانی چاہیے کیوں کہ وہ شدت پسندانہ سرگرمیوں کے فروغ میں ملوث ہیں البتہ میٹا کی پیغام رسانی کیلئے استعمال ہونے والی ایپ ’واٹس ایپ‘ پر پابندی عائد نہیں کی جائے گی کیوں کہ وہ عوامی پلیٹ فارم نہیں۔
خیال رہے کہ روس اور یوکرین کی جنگ کو تقریباً ایک ماہ ہونے کو ہے۔ روس امریکااور دیگر مغربی ممالک پر الزام عائد کرتا ہے کہ وہ روس کیخلاف نفرت انگیز مہم چلا رہے ہیں۔
اسلام آباد: (ویب ڈیسک) دوست ملک چین کے وزیر خارجہ تین روزہ دورے پر پاکستان پہنچ گئے۔ پاکستان پہنچنے پر چین کے وزیر خارجہ کا استقبال وزارت خارجہ کےاعلیٰ حکام اور چینی سفارتکاروں نے کیا۔ ذرائع کا کہنا ہے کہ چینی وزیر خارجہ شاہ محمود قریشی سے اہم ملاقات کریں گے، اس کے علاوہ ان کی صدرعارف علوی، وزیراعظم عمران خان اورآرمی چیف جنرل قمر جاوید باجوہ سے بھی ملاقاتیں ہوں گی۔ چینی وزیر خارجہ کے دورہ پاکستان کے دوران پاک چین اقتصادی،تجارتی، دفاعی امور اور سی پیک پرتبادلہ خیال ہوگا۔ وہ 23 مارچ کو یوم پاکستان کی پریڈ میں بھی شرکت کریں گے۔
پورٹ ناکس: (ویب ڈیسک) ایک امریکی جزیرے پر چھوٹی سی لائبریری میں صرف وہی کتابیں رکھی جاتی ہیں جنہیں ناپسندیدہ اور ممنوعہ قرار دیا جاچکا ہو۔
اس کا نام ’میٹی نیکس آئی لینڈ لائبریری‘ ہے جو پورٹ ناکس، مین سے 35 کلومیٹر دور سمندر میں ’میٹی نیکس‘ (Matinicus) نامی ایک جزیرے پر واقع ہے جس کی آبادی 100 افراد سے بھی کم ہے۔
یہ چھوٹی سی لائبریری ہر روز 24 گھنٹے کھلی رہتی ہے اور اس کا مقصد صرف وہی کتابیں جمع کرنا ہے جو امریکا میں عارضی طور پر یا ہمیشہ کےلیے ممنوعہ قرار دی جاچکی ہوں۔
ان کتابوں میں ’اینڈ ٹینگو میکس تھری،‘ ’ٹو کِل اے موکنگ برڈ،‘ ’دی ہینڈمیڈز ٹیل‘ اور ’دی گریپس اور ریتھ‘ کے علاوہ بھی کئی کتابیں شامل ہیں۔
اس لائبریری کا آغاز چند مقامی رضاکاروں نے ذاتی کوششوں سے کیا ہے، جن کا مقصد امریکیوں کو صبر، تحمل اور برداشت کی تربیت دینا ہے تاکہ وہ امریکی حکومت کی جانب سے ممنوعہ قرار دیئے گئے مواد (بالخصوص کتابوں) کا مطالعہ کرکے اس کے بارے میں پوری آزادی سے کوئی رائے قائم کرسکیں۔
فی الحال یہ لائبریری لکڑی سے بنی ہوئی ایک جھونپڑی جیسی عمارت میں قائم ہے جسے ان رضاکاروں نے ذاتی خرچ پر تعمیر کروایا ہے۔
امریکی ویب سائٹ ’بینگر ڈیلی نیوز‘ کے مطابق، اس لائبریری کے منتظمین مختلف افراد اور کتب خانوں سے ممنوعہ کتابیں خریدنے یا عطیہ لینے کےلیے بھی تیار ہیں۔
’’اگر آپ کسی (ممنوعہ) کتاب کو اپنی لائبریری میں دیکھنا نہیں چاہتے تو وہ ہمیں فروخت کردیجئے،‘‘ میٹی نیکس آئی لینڈ لائبریری سے وابستہ ایک رضاکار نے ویب سائٹ کے نمائندے سے کہا۔
بتاتے چلیں کہ اس لائبریری کی ابتداء 2016 میں کی گئی تھی لیکن یہاں ممنوعہ کتابیں رکھنے کا خیال اس جزیرے کے کچھ باشندوں کو 2020 میں آیا جسے انہوں نے عملی جامہ پہنانا بھی شروع کردیا۔
پچھلے سال ممنوعہ کتابوں کا سیکشن مرکزی لائبریری سے الگ کردیا گیا اور اسے علیحدہ لائبریری کی حیثیت دے دی گئی۔
اسلام آباد: (ویب ڈیسک) امریکی سفارت کاروں اور نیشنل ہائی ویز اینڈ موٹر وے پولیس (این ایچ ایم پی) کے انسپکٹر جنرل انعام غنی نے مل کر شیخوپورہ کے این ایچ ایم پی ٹریننگ کالج میں 100 خواتین پولیس عہدیداروں کے لئے ایک نئی بیرک سہولت کا افتتاح کیا۔ اقوام متحدہ کے دفتر برائے پروجیکٹ سروسز (یو این او پی ایس) کی جانب سے تعمیر کی گئی یہ سہولت پاکستان میں این ایچ ایم پی اور امریکی مشن کے درمیان شراکت داری سے معرض وجود میں آئی۔
اسلام آباد کے ڈائریکٹر آف انٹرنیشنل نارکوٹکس اینڈ لا انفورسمنٹ (آئی این ایل) افیئرز مارک ٹیرواکوسکی نے کہا کہ اس سہولت سے این ایچ ایم پی کو نئی بھرتی ہونے والی خواتین کو رہائش دینے میں مدد ملے گی اور جیسے جیسے زیادہ پاکستانی خواتین افسران کی صف میں شامل ہوں گی، وہ لازمی طور پر صنفی مسائل کے بارے میں پولیس کی تفہیم کو وسیع کریں گی اور سب اور خاص طور پر خواتین کو پیش کی جانے والی خدمات کے معیار میں اضافہ کریں گی۔
یو این او پی ایس پاکستان کی کنٹری منیجر میریسیا زپاسنک نے کہا کہ سماجی روایتوں کی وجہ سے خواتین کے لیے کچھ عرصہ قبل تک پولیس میں شامل ہونا مشکل تھا: ہم سمجھتے ہیں کہ اس تعصب کو توڑنا خواتین کی مساوات کو استوار کرنے اور امتیازی سلوک کو ختم کرنے کے لیے بنیاد کا درجہ رکھتا ہے۔ ہمارے منصوبے خواتین پولیس افسران کے لئے بنیادی ڈھانچہ تعمیر کرتے ہیں تاکہ زیادہ سے زیادہ خواتین پولیس کے پیشے میں شامل ہو سکیں، دقیانوسی تصورات کو توڑ سکیں، دیگر خواتین کے لئے رول ماڈل بن سکیں اور پاکستان کے عوام کو بہتر اور زیادہ جامع خدمات فراہم کر سکیں۔
اس سال آئی این ایل کے ذریعے، امریکی مشن اور پاکستان کے درمیان “انصاف، سلامتی اور خوشحالی” کے جھنڈے تلے شراکت داری کی 40ویں سالگرہ منائی جا رہی ہے جس میں پاکستان بھر میں شہریوں کی سلامتی کو بہتر بنانے اور قانون نافذ کرنے کی صلاحیت بڑھانے کے لئے چار دہائیوں پر محیط کوششیں کی گئی ہیں۔ ان کاوشوں میں خواتین کی نئی بیرکوں کی تعمیر کے لئے درکار فنڈز میں حصہ ڈالنا بھی شامل ہے۔ اسی طرح اس سال امریکہ اور پاکستان کے تعلقات کی 75ویں سالگرہ ہے اور آئی این ایل کےتعاون کی طویل تاریخ ہمارے دونوں ممالک کے تعلقات کی گہرائی اور وسعت کی ایک اور مثال ہے۔
امریکی محکمہ خارجہ کا بیورو آف انٹرنیشنل نارکوٹکس اینڈ لا انفورسمنٹ افیئرز جرائم اور بدعنوانی سے نمٹنے میں مدد کے لیے 90 سے زائد ممالک کے ساتھ شراکت دار ہے۔ منشیات کی تجارت کا خاتمہ، پولیس کو بہتر بنانا، اور منصفانہ عدالتی نظام کو فروغ دینا اس شراکت کی شکلیں ہیں۔
راولپنڈی: (ویب ڈیسک) آرمی چیف جنرل قمر جاوید باجوہ سے مصر کے وزیر خارجہ نے ملاقات کی جس میں دوطرفہ تعاون اوردیگر امور پر تبادلہ خیال کیا گیا، سپہ سالار نے پاکستان اور مصر کے باہمی تعلقات کے فروغ پر زور دیا۔
پاک فوج کے شعبہ تعلقات عامہ (آئی ایس پی آر) کے مطابق مصر کے وزیر خارجہ کی جی ایچ کیو آمد ہوئی، آرمی چیف جنرل قمر جاوید باجوہ سے ملاقات میں باہمی دلچسپی علاقائی سلامتی، دفاعی اورسکیورٹی کے تمام شعبوں میں تعاون پر تبادلہ خیال کیا گیا۔
اس موقع پر آرمی چیف جنرل قمر جاوید باجوہ نے کہا کہ پاکستان اور مصر کے مابین حقیقی برادرانہ تعلقات ہیں، دونوں ملکوں کےمابین ہرشعبےمیں تعاون کو مزید بڑھانے کی ضرورت ہے۔
آئی ایس پی آر کے مطابق آرمی چیف جنرل قمر جاوید باجوہ نے کہا کہ اوآئی سی کے وزرائے خارجہ کانفرنس ایک تاریخی پیش رفت ہے، کانفرنس میں افغانستان میں انسانی صورتحال پر غور، عالمی برادری سے تعاون پر بات ہوگی، خطے میں دیرپا امن و استحکام کیلئے درپیش چیلنجز کا حل تلاش کرنے کی ضرورت ہے۔
ترجمان پاک فوج کے مطابق مصری وزیرخارجہ نےعلاقائی امن واستحکام کیلئے پاکستان کے کردار کی تعریف کی اور پاکستان کیساتھ سفارتی تعاون کو مزید فروغ دینے کیلئے اپنا کردار ادا کرنے کےعزم کا اعادہ کیا۔
کراچی: (ویب ڈیسک) پاکستان پیپلزپارٹی سندھ کے سیکریٹری اطلاعات عاجز دھامرا نے دعویٰ کیا ہے کہ پاکستان تحریک انصاف پارٹی فنڈنگ کیس میں ختم ہو جائے گی۔ انہوں نے کہا کہ اسپیکر نااہل حکومت کے سہولت کار بنے ہوئے ہیں۔
پی پی سے تعلق رکھنے والے سابق سینیٹر عاجز دھامرا نے کہا ہے کہ پی ٹی آئی کے منحرف اراکین نے جمہوری طریقہ سے تبدیلی کا فیصلہ کیا اور اس فیصلے پر انہیں خراج تحسین پیش کرتا ہوں۔
انہوں نے کہا کہ تحریک عدم اعتماد کے حوالے سے تیاریاں مکمل ہیں، حکومت کل اجلاس طلب کر لے۔ انہوں نے کہا کہ جمہوریت بچانے کے لیے بہت صبر سے کام لیا ہے، ہمیں دھمکیاں نہ دی جائیں۔
عاجز دھامرا نے کہا کہ وزیراعظم نے بھارت کی خارجہ پالیسی کی تعریف کرکے پاکستانی عوام کے دل دکھائے ہیں۔
پی پی رہنما نے کہا کہ جو اراکین ووٹ ڈالنے پہنچے ہیں ان کا تحفظ کرنا قانونی حق ہے، ایم کیو ایم نے سندھ تقسیم کا کوئی مطالبہ نہیں رکھا ہے۔
اسلام آباد: (ویب ڈیسک) وزیراعظم عمران خان سے آذربائیجان کے وزیر دفاع ذاکر حسنوف نے ملاقات کی جس میں پاکستان اور آذربائیجان کے درمیان مضبوط دفاعی تعلقات پر گفتگو ہوئی جبکہ وزیراعظم نے دوطرفہ تجارت، سیاحتی رابطوں کے فروغ کے عزم کا اعادہ کیا۔
وزیراعظم آفس اسلام آباد سے جاری اعلامیہ کے مطابق وزیراعظم نے آذربائیجان سے برادرانہ تعلقات کو مزید وسعت دینے کی خواہش کا اظہارکیا۔
وزیراعظم نے او آئی سی میں آذربائیجان کے تعاون کی تعریف کی، امن اور خوشحالی کے مقصد کے حصول میں آذربائیجان کی کوششوں کو سراہا۔
وزیر دفاع حسنوف نے آذربائیجان کے صدر کی طرف سے وزیر اعظم کو مبارکباد پیش کی۔
واضح رہے کہ آذربائیجان کی مسلح افواج کا دستہ 23 مارچ 2022 کو پاکستان کے قومی دن کی پریڈ میں شرکت کرے گا۔
لاہور: (ویب ڈیسک) قومی ٹیم کے فاسٹ بولر نسیم شاہ نے کہا ہے کہ ٹیسٹ میچ کے دوسرے جلد وکٹیں لینے کی نیت سے میدان میں اتریں گے اور آسٹریلیا کو تین سو رنز تک محدود رکھنے کی کوشش کریں گے۔
لاہور ٹیسٹ کے پہلے روز کا کھیل ختم ہونے کے بعد صحافیوں سے گفتگو کرتے ہوئے نسیم شاہ نے کہا کہ پچ پر بال ریورس سوئنگ ہورہا ہے، ہم اسی چیز کا فائدہ اٹھانا چاہتے ہیں، اسٹیو اسمتھ کی وکٹ یادگار رہی، ان کو ایک لائن پر بولنگ کی تاکہ وہ غلطی کرے اور ہمیں کامیابی مل سکے۔
نسیم شاہ کا کہنا تھا کہ آج کے دن ہم اپنی حکمت عملی میں کامیاب رہے اور ایک تجربہ کار بلے باز کو آوٹ کرکے پوزیشن مستحکم بناسکے۔ نوجوان بولر نے کہا کہ لاہور کا موسم گرم ہے، ٹیسٹ کرکٹ میں فاسٹ بولنگ کرنا مشکل کام ہے کیونکہ فاسٹ بولر کو لمبی بولنگ کرنا پڑتی ہے۔
انہوں نے کہا کہ ہماری کوشش ہوتی ہے کہ خود کو مطمئن رکھیں اور کھیل پر توجہ دے کر اچھی بولنگ کریں، وکٹ نہ ملنے پر غصہ کرنے سے بولر کی پرفارمنس بہتر نہیں ہوسکتی، اعصاب پر جتنا قابو رکھیں گے، اس سے کارکرددگی بہتر بنانے میں مدد ملے گی۔
