لاہور: (ویب ڈیسک) براڈ شیٹ کے سربراہ کاوے موسوی نے سابق وزیراعظم نواز شریف کے خلاف لگائے گئے الزامات سے دستبردار ہوتے ہوئے معافی مانگ لی۔
جنگ اخبار کے مطابق انٹرویو میں براڈ شیٹ کے سی ای او کاوے موسوی نے کہا کہ وہ دو دہائیوں تک احتساب کے نام پر نوازشریف کو نشانہ بنانے کی کارروائیوں کا حصہ بننے پر شرمندہ ہیں۔
انہوں نے کہا کہ وہ ریکارڈ کی درستگی کے لئے معافی چاہتے ہیں کیونکہ دودہائیوں سے جاری براڈ شیٹ کی فرانزک تحقیقات کے دوران نواز شریف یا ان کی فیملی کے حوالے سے ’’ایک روپیہ‘‘ کی کرپشن کا ثبوت نہیں ملا۔

اسلام آباد: (ویب ڈیسک) پی ڈی ایم کے سربراہ مولانا فضل الرحمان آج ایم کیوایم کے مرکز بہادرآباد جائیں گے۔
مولانا فضل الرحمان اور ایم کیوایم قیادت کے درمیان ملاقات ہو گی۔ ملاقات میں ملکی سیاسی صورتحال اور دیگر امور پر تبادلہ خیال کیاجائےگا۔
مولانا فضل الرحمان ایم کیو ایم قیادت سے وزیر اعظم عمران خان کے خلاف عدم اعتماد پر حمایت مانگیں گے۔
گزشتہ روز اپوزیشن کے وفد نے اسلام آباد کے پارلیمنٹ لاجز میں ایم کیو ایم کے رہنماؤں سے اہم ملاقات کی۔ ملاقات میں سیاسی صورتحال ، تحریک عدم اعتماد اور دیگر امور پر تبادلہ خیال کیا گیا۔
ملاقات میں ایم کیو ایم اور دیگر جماعتوں میں ملاقاتوں اور پیش رفت کا بھی جائزہ لیا گیا۔
ترجمان ایم کیو ایم کے مطابق اپوزیشن وفد میں اختر مینگل ، احسن اقبال،ایاز صادق ، راناثنااللہ اور خواجہ سعد رفیق جبکہ پیپلز پارٹی کے خورشید شاہ اور سہیل انور سیال شریک ہوئے ۔
جبکہ ایم کیو ایم کے وفد میں سینیر ڈپٹی کنوینر عامر خان ، وسیم اختر اور امین الحق شامل تھے۔

اسلام آباد: (ویب ڈیسک) وزیر اعظم عمران خان پر ایک ہفتے میں دوسری بار جرمانہ ہو گیا۔
وزیراعظم عمران خان کو ایک بار پھر جرمانہ کردیا گیا۔ ڈسٹرکٹ مانیٹرنگ آفیسر سوات نے وزیر اعظم عمران خان پر 50 ہزار روپے کا جرمانہ عائد کردیا۔
وزیر اعظم کو جرمانہ انتخابی ضابطہ اخلاق کی خلاف ورزی پر کیا گیا ہے۔ خیبر پختونخوا میں بلدیاتی انتخابات کا دوسرا مرحلہ چل رہا ہے اس لیے عوامی نمائندوں کے انتخابات والے اضلاع میں جلسے جلوسوں اور انتخابی مہم چلانے پر پابندی ہے۔
وزیر اعظم عمران خان نے پابندی کے باوجود سوات میں جلسہ کیا تھا۔ ڈسٹرکٹ مانیٹرنگ افسر نے وزیر اعظم کے علاوہ وفاقی وزرا اور صوبائی وزیروں کو بھی جرمانہ کیا ہے۔
اس سے قبل لوئر دیر کے ڈسٹرکٹ مانیٹرنگ آفیسر نے بھی عمران خان کو انتخابی ضابطہ اخلاق کی خلاف ورزی پر جرمانہ کیا تھا۔

اسلام آباد: (ویب ڈیسک) مسلم لیگ ن کی نائب صدر مریم نواز کی طبیعت کی ناسازی کے باعث مسلم لیگ ن کا سوات جلسہ منسوخ کر دیا گیا۔
ترجمان مسلم لیگ ن مریم اورنگزیب کے مطابق مریم نواز کی طبیعت اچانک خراب ہوگئی ہے۔ تیز بخار کی وجہ سے ڈاکٹروں نے انہیں سفر سے منع کردیا ہے۔
مریم اورنگزیب نے کہا کہ خیبرپختونخوا خاص طور پر اہل سوات سے معذرت خواہ ہیں۔ مریم نوازشریف کی صحت یابی کے لئے دعا کی اپیل کرتے ہیں۔
واضح رہے کہ مریم نواز گزشتہ روز اسلام آباد ہائی کورٹ میں ایون فیلڈ ریفرنس پر اپیل کی سماعت کے دوران عدالت پیش ہوئی تھی۔ انہوں نے میڈیا سے گفتگو بھی کی تھی۔
مریم نواز نے 24 مارچ کو حمزہ شہباز کے ہمراہ لاہور سے مارچ لے کر اسلام آباد کی طرف روانہ ہونا ہے۔
مسلم لیگ ن کی طرف سے پہلے سے جاری شیڈول کے مطابق کاروان 24 مارچ کو لاہور سے روانہ ہو گا اور مختلف مقامات پر قیام کرتا ہوا 27 مارچ کو اسلام آباد پہنچے گا۔

اسلام آباد: (ویب ڈیسک) او آئی سی کی وزرائے خارجہ کونسل کے 2 روزہ اجلاس کا آج سے اسلام آباد میں آغاز ہو رہا ہے جس میں 48 ممبر ممالک کے وزرا شریک ہوں گے۔ وزیراعظم عمران خان افتتاحی سیشن سے خطاب کریں گے۔
تاریخ ساز لمحہ آ گیا، پاکستان کی میزبانی میں او آئی سی وزرائے خارجہ کانفرنس کا آج وفاقی دارالحکومت اسلام آباد میں انعقاد ہو رہا ہے جس میں 150 سے زائد قراردادیں منظور ہونے کا امکان ہے جو کشمیر، فلسطین، اسلام فوبیا، اُمّہ کے اتحاد سمیت مختلف مسائل و معاملات سے متعلق ہیں۔
مسئلہ کشمیر کی خصوصی اہمیت کے پیش نظر او آئی سی رابطہ گروپ کا اجلاس ہو گا جس میں گذشتہ 7 دہائیوں سے مقبوضہ وادی میں جاری بھارتی مظالم کی مذمت کی جائے گی۔
اجلاس میں شرکت کے لیے اسلامی سربراہی کانفرنس کے سیکرٹری جنرل، مصر، سعودی عرب اور چین کے وزرائے خارجہ سمیت کئی ممالک کے نائب وزرائے خارجہ اور عالمی اداروں کے سربراہان اور مندوبین پاکستان پہنچ چکے ہیں۔
اسلامی ترقیاتی بینک (آئی ڈی بی) کے صدر محمد سلیمان الجاسر، صومالیہ کے وزیر خارجہ عابدی سید موسیٰ علی، آذربائیجان کے نائب وزیر خارجہ النورمحمدوف، مغربی افریقی ملک کوٹ ڈیو وا کی وزیر خارجہ کاندیا کمارا نی کامیسوکو، گیمبیا کے وزیرخارجہ ڈاکٹر میمدو تنگارا سمیت مختلف ممالک کے وفود بھی اجلاس میں شرکت کے لیے اسلام آباد پہنچ چکے ہیں۔ مالدیپ کے او آئی سی میں مستقبل مندوب محمد خلیل بھی اجلاس میں شرکت کے لیے وفاقی دارالحکومت میں موجود ہیں۔
کانفرنس میں شرکت کرنے والے معزز مہمانان گرامی کل یوم پاکستان کے موقع پر ہونے والی مسلح افواج کی پریڈ میں خصوصی شرکت کریں گے۔ کانفرنس کے اختتامی سیشن کے بعد وزیرخارجہ شاہ محمود قریشی، او آئی سی کے سیکرٹری جنرل حسین براہیم طحٰہ کے ہمراہ پریس کانفرنس کریں گے۔

لاہور: (ویب ڈیسک) محکمہ موسمیات کے مطابق آج ملک کے بیشترعلاقوں میں موسم گرم اورخشک رہے گا۔
موسم کا حال بتانے والوں کے مطابق گزشتہ روز گلگت بلتستان اور کشمیر کے کچھ علاقوں میں بارش ہوئی، آج ملک کے بیشتر علاقوں میں موسم خشک رہنے کی پیشگوئی ہے، خیبرپختونخوا اور پنجاب میں موسم گرم اور خشک رہے گا، سندھ میں گرمی کی شدت برقرار رہے گی۔
محکمہ موسمیات کےمطابق کوئٹہ سمیت بلوچستان کے اکثرعلاقوں میں بھی موسم گرم اور خشک رہنے کا امکان ہے، زیارت میں درجہ حرارت 22، قلات اور کوئٹہ میں 25، گوادر میں 34، جیونی میں 32، نوکنڈی میں 31، سبی میں 40 اور تربت میں 37 سینٹی گریڈ ریکارڈ کیا گیا۔