لاہور(خصوصی رپورٹ)محکمہ سکولز ایجوکیشن نے میٹرک سالانہ امتحانات 2017 میں ناقص کارکردگی دکھانے والے سرکاری سکولوں کے سربراہوں اور ذمہ دار اساتذہ کیخلاف سخت کارروائی عمل میں لانے کا فیصلہ کیا ہے ۔ اس ضمن میں تمام اضلاع کی ایجو کیشن اتھا رٹیوں کے سر براہوں کو اپنے اپنے ضلع کے ناقص نتائج والے سکولوں کی رپورٹ جلد از جلد محکمہ کو بھجوانے کی ہدایات جاری کر دی گئی ہیں۔ پنجاب ٹیچرز یونین کا کہنا ہے کہ حکومت خود اساتذہ کو انسداد پولیو، ڈینگی، مردم شماری سمیت دیگر کاموں میں الجھائے رکھتی ہے اور جب رزلٹ خراب آتا ہے تو اس کا ذمہ دار بھی ہمیں ٹھہرایاجاتا ہے ، ایسے حالات میں کیسے سرکاری سکولوں کے نتائج بہتر ہو سکتے ہیں ،یہی وجہ ہے کہ سرکاری اداروں کی کارکردگی ناقص ہے ۔

ملتان (نیوز ڈیسک) حکومت پنجاب نے سکیورٹی خدشات کے پیش نظر سکول اسمبلی پر پابندی عائد کردی ہے محکمہ تعلیم کے ذرائع کے مطابق سکیورٹی خدشات کے پیش نظر محکمہ تعلیم نے صبح کے اوقات میں اسمبلی نا کروانے کی ہدایت جاری کی ہے اسمبلی کلاس کی سطح پر کروانے کے احکامات بھی جاری کئے گئے ہیں۔یوا ین پی کے مطابق حکومت کو اطلاعات ملی ہیں کہ ملک دشمن عناصر اسمبلی کے دوران کوئی واردات کرسکتے ہیں جس کے پیش نظر تمام سرکاری و پرائیویٹ تعلیمی اداروں کے سربراہوں کو کہا گیا ہے کہ وہ کلاس کی سطح پر اسمبلی کروائیں نہ کہ کھلے میدان میں اسمبلی کا اہتمام کریں ذرائع کا یہ بھی کہنا ہے کہ یہ پابندی کچھ عرصہ کےلئے حالات معمول پر آتے ہی اسمبلیوں کا سابقہ طریقہ کار بحال کردیا جائیگا۔