10 اہم شخصیات کالعدم تنظیموں کا ہدف …. ریکی شروع

لاہور (خصوصی رپورٹ) حساس اداروں کی طرف سے 10اہم شخصیات کو کالعدم تحریک طالبان پاکستان کی طرف سے دہشت گردی کا نشانہ بنانے کا خدشہ ظاہر کیا گیا ہے۔ مذکورہ شخصیات کی ریکی بھی کی گئی ہے۔ رپورٹ کے بعد آئی جی پنجاب‘ ہوم سیکرٹری پنجاب کی طرف سے فوری طور پر قانون نافذ کرنے والے اداروں کو ان شخصیات اور ان کی فیملیوں کی سکیورٹی کو فول پروف کرنے کے احکامات جاری کئے گئے ہیں جبکہ ان شخصیات کو اپنی نقل و حرکت بھی کم کرنے کی ہدایات کر دی گئی ہیں۔ ان کی رہائش گاہوں کے اردگرد سرچ آپریشن بھی کئے گئے ہیں۔ حساس اداروں کی طرف سے آگاہ کیا گیا ہے کہ ان شخصیات اور ان کی فیملیوں کو کسی وقت بھی دہشت گردی کا نشانہ بنایا جا سکتا ہے۔ تربیت یافتہ دہشت گرد جنوبی وزیرستان سے پنجاب میں داخل ہو چکے ہیں۔ اس رپورٹ پر آئی جی پنجاب مشتاق احمد سکھیرا‘ ہوم سیکرٹری پنجاب اعظم سلیمان کی طرف سے فوری طور پر پنجاب پولیس سمیت دیگر قانون نافذ کرنے والے اداروں کو ایک مراسلہ جاری کیا گیا ہے۔ آئی جی پنجاب کی طرف سے احکامات ملنے پر لاہور سمیت پنجاب کے دیگر شہروں میں رہائش پذیر شخصیات کی سکیورٹی ہائی الرٹ کی گئی ہے۔ ان احکامات کی روشنی میں ڈی آئی جی آئی آپریشن لاہور ڈاکٹر حیدراشرف نے تمام ڈویژنل ایس پیز‘ سرکل افسران‘ ایس ایچ اوز کو سخت احکامات جاری کئے ہیں کہ وہ اپنے اپنے علاقہ جات میں رہائش پذیر اہم شخصیات اور ان کی فیملیوں کی رہائش گاہوں پر سکیورٹی سخت کریں۔ ان کی نقل و حرکت کے دوران بھی سکیورٹی انتہائی الرٹ کی جائے۔ شہر بھر میں سرچ آپریشن بھی کیا جا رہا ہے۔
دہشت گردی خدشہ