ورلڈ تائیکوانڈو پریزیڈنٹ کپ ایشین ریجن کے مقابلوں کے چوتھے روز سینئر کیوروگی کی مزید چار کیٹیگریز کے فائنل مقابلے مکمل ہوگئے، جہاں پاکستان کے شاہ زیب خان نے منفی 54 کلوگرام کیٹیگری میں کانسی کا تمغہ حاصل کرکے ملک کا نام روشن کیا۔
مردوں کی منفی 54 کلوگرام کیٹیگری میں جنوبی کوریا کے سی او ایونسو نے گولڈ میڈل جبکہ ان کے ہم وطن لی ڈونگ گن نے سلور میڈل جیتا۔ پاکستان کے شاہ زیب خان اور اردن کے الداؤد جعفر نے کانسی کے تمغے اپنے نام کیے۔
خواتین کی منفی 46 کلوگرام کیٹیگری میں جنوبی کوریا کی ہا من سیو نے طلائی اور تھائی لینڈ کی سیکن کامونچانوک نے چاندی کا تمغہ حاصل کیا۔ جاپان کی اوکازاکی ہیناتا اور ایران کی کریمی راجہردی سائنہ نے کانسی کے تمغے جیتے۔
خواتین کی پلس 57 کلوگرام کیٹیگری میں کوریا کی کم یوجن نے گولڈ جبکہ اردن کی فادیہ نے سلور میڈل حاصل کیا۔ ازبکستان کی مدینہ مربزل اور ایران کی ناہید نے برانز میڈلز جیتے۔
مردوں کی پلس 68 کلوگرام کیٹیگری میں ایران کے دانیال نے گولڈ اور ازبکستان کے شوقی جاگون نے سلور میڈل اپنے نام کیا، جبکہ کوریا کے جنو من اور روس کے قازبلٹ کانسی کے تمغوں کے حقدار قرار پائے۔
شاہ زیب خان کا کانسی کا تمغہ پاکستان کے لیے اس عالمی سطح کے مقابلے میں ایک اہم کامیابی قرار دیا جا رہا ہے، جبکہ ایشین ریجن کے مقابلوں میں مختلف ممالک کے بہترین تائیکوانڈو کھلاڑیوں نے اپنی صلاحیتوں کا مظاہرہ کیا۔
